ایس آئی اے نے تھانہ منڈی دہشت گردانہ حملے میں ملوث ملزم کے خلاف چارج شیٹ داخل کی
جموں، 03 اپریل (ہ س)۔ ضلع راجوری کے تھانہ منڈی میں پیش آئے دہشت گردانہ حملے کی تحقیقات میں اہم پیش رفت کرتے ہوئے اسٹیٹ انویسٹی گیشن ایجنسی (ایس آئی اے) جموں و کشمیر نے ایک ملزم کے خلاف چارج شیٹ داخل کر دی ہے۔
سرکاری بیان کے مطابق، ملزم صابر حسین کے خلاف نامزد عدالت میں چارج شیٹ پیش کی گئی ہے۔ اس پر الزام ہے کہ اس نے لشکرِ طیبہ اور دی ریزسٹنس فرنٹ سے وابستہ دہشت گردوں کو پناہ، خوراک اور دیگر لاجسٹک مدد فراہم کی، جو ایک شہری محمد رزاق کے قتل میں ملوث تھے۔
یہ واقعہ 22 اپریل 2024 کو پیش آیا تھا، جب نامعلوم دہشت گردوں نے شاہدرہ شریف کے علاقے کنڈا میں محمد رزاق کے گھر میں گھس کر اندھا دھند فائرنگ کی۔ اس حملے میں محمد رزاق موقع پر ہی جاں بحق ہو گئے جبکہ ان کے بھائی طاہر خورشید عرف طاہر فوجی زخمی ہو گئے تھے۔
واقعہ کے بعد پولیس اسٹیشن تھانہ منڈی میں مقدمہ درج کر کے تحقیقات شروع کی گئی، تاہم کیس کی سنگینی کو دیکھتے ہوئے اسے مزید تفتیش کے لیے ایس آئی اے کے حوالے کر دیا گیا۔
تحقیقات کے دوران اہم شواہد جمع کیے گئے اور گواہوں کے بیانات قلمبند کیے گئے۔ تفتیش میں یہ بات سامنے آئی کہ صابر حسین نے جون کے آخر سے جولائی 2024 کے اوائل تک اپنے موسمی ڈیرے میں تین دہشت گردوں کو پناہ دی، جس سے حملے کو انجام دینے میں مدد ملی۔
ایس آئی اے کے مطابق، ملزم کے خلاف غیر قانونی سرگرمیوں کی روک تھام ایکٹ 1967 کے تحت مقدمہ قائم کیا گیا ہے اور کیس کی چارج شیٹ عدالت میں داخل کر دی گئی ہے۔
ہندوستھان سماچار
---------------
ہندوستان سماچار / محمد اصغر
