لبنان/تل ابیب، 29 اپریل (ہ س)۔ اسرائیل ڈیفنس فورسز (آئی ڈی ایف) نے جنوبی لبنان میں حملہ کر کے جنگجو گروہ حزب اللہ کی ایک بڑی سرنگ کو اڑا دیا۔ اس حملے میں درجنوں جنگجو مارے گئے ہیں۔ اسرائیل کے وزیر اعظم بنجامن نیتن یاہو نے حملے کی تصدیق کی ہے۔ نیتن یاہو نے ایکس پر ویڈیو شیئر کر کے یہ معلومات دی۔

وزیر اعظم نیتن یاہو نے ایکس پر لکھا، ’’آج ہم نے حزب اللہ کی ایک بہت بڑی سرنگ کو اڑا دیا۔ ہم ان کے دہشت گردانہ ڈھانچے کو تباہ کر رہے ہیں۔ حملے میں درجنوں جنگجووں کو ہلاک کر دیا گیا ہے۔ ابھی اور بھی بہت کچھ ہونا باقی ہے۔‘‘ آئی ڈی ایف نے کہا کہ دو کلومیٹر طویل یہ سرنگ جنوبی لبنان کے قنطارہ میں ڈویژن 36 میں تھی۔ اس کی گہرائی زمین سے 25 میٹر نیچے تھی۔ اس سرنگ کی تعمیر ایران کی مدد سے ہوئی تھی۔

آئی ڈی ایف نے بتایا کہ منگل کو 450 ٹن دھماکہ خیز مواد کی مدد سے اس سرنگ کو تباہ کر دیا گیا ہے۔ یہ سرنگ پتھریلی گرینائٹ چٹان میں کھودی گئی تھی۔ سرنگ کے اندر 30 کمرے تھے۔ اس سرنگ میں ہتھیاروں کا بڑا ذخیرہ چھپا ہوا تھا۔ اس کی حفاظت کے لیے درجنوں جنگجو تعینات تھے۔ حملے میں تمام جنگجو مارے گئے۔

ٹائمز آف اسرائیل کی رپورٹ کے مطابق، آئی ڈی ایف نے بتایا کہ منگل کو حزب اللہ نے جنوبی لبنان میں تعینات اسرائیلی فوجیوں پر ڈرون سے حملہ کیا۔ ایک دن پہلے ڈرون حملے میں ایک فوجی شدید زخمی ہو گیا تھا۔ آئی ڈی ایف کے مطابق، منگل کو ہی جنوبی لبنان میں حزب اللہ کے ایک ڈرون حملے میں وزارتِ دفاع کا سویلین کنٹریکٹر عامر حجیرات (44) مارا گیا۔ اس حملے میں ٹھیکیدار کا بیٹا بھی چھرے لگنے سے زخمی ہو گیا ہے۔

ہندوستھان سماچار

---------------

ہندوستان سماچار / انظر حسن