نئی دہلی، 28 اپریل (ہ س)۔ دہلی پولیس کی کرائم برانچ نے راجدھانی میں فعال ہیروئن کی اسمگلنگ کے ایک بڑے نیٹ ورک کا پردہ فاش کیا ہے اور ایک انعامی بدمعاش کو گرفتار کیا ہے جس پر 20,000 روپے کا انعام ہے۔ ملزم کے قبضے سے 100 گرام ہیروئن برآمد ہوئی۔ پولیس کا کہنا ہے کہ اس معاملے میں اب تک مجموعی طور پر 612 گرام ہیروئن (اسمیک) برآمد کی جا چکی ہے جس کی بین الاقوامی مارکیٹ میں مالیت تقریباً 3 کروڑ روپے بتائی جاتی ہے۔

گرفتار ملزم کی شناخت 31 سالہ وجے کے طور پر ہوئی ہے جو کرالہ کا رہنے والا ہے۔ اس کیس میں اسے عدالت پہلے ہی مفرور قرار دے چکی ہے۔ اس کی گرفتاری پر 20 ہزار روپے انعام کا اعلان کیا گیا تھا۔ پولیس کے مطابق، وجے اس پورے نیٹ ورک کا اہم سورس سپلائر تھا اور طویل عرصے سے مفرور تھا۔

نارائنا-اندرپوری میں خفیہ اطلاع پر چھاپہ ماری

کرائم برانچ کے ڈپٹی کمشنر آف پولیس راہل الاول نے منگل کو کہا کہ کرائم برانچ کی انسداد منشیات ٹاسک فورس (اے این ٹی ایف) کو 27 اپریل کو اطلاع ملی کہ وجے ماروتی سوئفٹ کار میں نارائنا علاقے میں کسی سے ملنے آنے والا ہے ۔ اس کے بعد انسپکٹر وکاس پنو کی نگرانی میں ایک ٹیم تشکیل دی گئی اور جال بچھایا گیا۔ ٹیم نے اندر پوری علاقے میں چھاپہ مار کر وجے کو گرفتار کر لیا۔ تلاشی کے دوران اس کی گاڑی سے 100 گرام ہیروئن برآمد ہوئی۔ پولیس نے کار بھی اپنے قبضے میں لے لی، جو اس کے رشتہ دار کے نام پر رجسٹرڈ تھی۔

نیٹ ورک کا جنوری 2025 میں پتہ لگا تھا

پولیس کے مطابق، 20 جنوری 2025 کو موصولہ اطلاع کی بنیاد پر، اے این ٹی ایف نے پشپا عرف بنی اور آوش عرف بٹو کو 512 گرام اسمیک اور 94 پیکٹوں کے ساتھ گرفتار کیا تھا۔ کرائم برانچ پولیس اسٹیشن میں این ڈی پی ایس ایکٹ کی دفعات کے تحت ایف آئی آر درج کی گئی ہے۔ تفتیش سے پتہ چلا کہ پشپا کو ہیروئن اس کا داماد اکشے، وجے، کسم اور راہل عرف کاکو فراہم کراتے تھے۔

کئی ملزمان پہلے بھی گرفتار ہو چکے ہیں

تفتیش کے دوران فرار ہونے والے اکشے کو بعد میں گرفتار کر لیا گیا۔ وہیں،وجے کے ساتھی، اوتار سنگھ عرف رکی کو بھی پکڑا گیا تھا اور اس کے پاس سے 5.10 لاکھ روپے نقد اور ایک کے ٹی ایم بائک جو ہیروئن سپلائی کرنے کے لیے استعمال کی جاتی تھی، برآمد کی گئی تھی۔ وجے، کسم اور راہل عرف کاکو کو بعد میں اس کیس میں اشتہاری مجرم قرار دیا گیا۔

منشیات کا پورا نیٹ ورک اس طرح چلتا تھا

پوچھ گچھ کے دوران انکشاف ہوا کہ پشپا اسمیک کو چھوٹے پیکٹوں میں پیک کر کے حیدر پور ریلوے لائن کے قریب نشہ کرنے والوں کو فروخت کرتی تھی۔ بٹو نے اسے تقسیم کرتا تھا، جب کہ وجے بریلی سے ہیروئن لا کر پشپا اور اکشے کو پہنچاتا تھا۔ پولیس کے مطابق، وجے نے صرف نویں جماعت تک تعلیم حاصل کی تھی اور رکی کی گرفتاری کے بعد سے مسلسل جگہ بدلتے ہوئے فرار چل رہا تھا۔

ہندوستھان سماچار

ہندوستان سماچار / محمد شہزاد