جموں, 26 اپریل (ہ س)۔ اُدھمپور کے حالیہ بس حادثے میں شدید زخمی ہونے والے ایک 47 سالہ شخص کو گورنمنٹ میڈیکل کالج (جی ایم سی) جموں کے ڈاکٹروں نے جدید سرجری کے ذریعے نئی زندگی دے دی۔

اطلاعات کے مطابق 20 اپریل کو رام نگر، اُدھمپور میں ایک مسافر بس تقریباً 100 میٹر گہری کھائی میں گر گئی تھی، جس کے نتیجے میں 21 افراد ہلاک اور 51 دیگر زخمی ہو گئے تھے۔ زخمی ہونے والوں میں شامل مذکورہ شخص کو سینے میں شدید چوٹیں، پسلیوں کے متعدد فریکچر اور سینے کی ہڈی (اسٹرنم) کے مکمل ٹوٹنے کا سامنا تھا، جس سے اس کی حالت انتہائی نازک ہو گئی تھی۔

جی ایم سی کے ترجمان نے بتایا کہ مریض کو فلیل چیسٹ جیسی خطرناک حالت لاحق ہو گئی تھی، جس میں سانس لینے کا نظام بری طرح متاثر ہو جاتا ہے۔ اسپتال پہنچنے پر مریض شدید صدمے میں تھا اور آکسیجن برقرار رکھنے سے قاصر تھا۔

کارڈیو ویسکولر و تھوراسک سرجری کے شعبے کے سربراہ ڈاکٹر شیام سنگھ کی قیادت میں ماہر ڈاکٹروں کی ٹیم نے پیچیدہ سرجری کرتے ہوئے ٹائٹینیم پلیٹس اور پیچ کے ذریعے سینے کی ہڈی اور ٹوٹی ہوئی پسلیوں کو کامیابی سے جوڑا۔

ڈاکٹر پوجا ویمیش، سربراہ کارڈیو تھوراسک اینستھیزیا، کے مطابق سرجری کے بعد مریض کی حالت میں نمایاں بہتری آئی اور اسے وینٹی لیٹر سے ہٹا دیا گیا۔ اس وقت مریض اسپتال کے آئی سی یو میں زیر علاج ہے اور صحت یاب ہو رہا ہے۔

جی ایم سی انتظامیہ کے مطابق یہ کامیاب آپریشن اس بات کا مظہر ہے کہ اسپتال اب پیچیدہ حادثاتی کیسز سے نمٹنے کی جدید صلاحیت رکھتا ہے۔

ہندوستھان سماچار

---------------

ہندوستان سماچار / محمد اصغر