واشنگٹن،20اپریل(ہ س)۔جیف بیزوس کی قائم کردہ خلائی کمپنی ''بلو اوریجن'' نے اتوار کو اعلان کیا ہے کہ اس کے بھاری راکٹ ''نیو گلین'' نے اپنی تیسری پرواز کے دوران ایک مصنوعی سیٹلائٹ کو غلط مدار میں پہنچا دیا۔کمپنی کے مطابق اس واقعے کی وجوہات ابھی زیرِ تفتیش ہیں۔ بیان میں کہا گیا: ہم اس وقت صورتحال کا جائزہ لے رہے ہیں اور جیسے ہی مزید تفصیلی معلومات دستیاب ہوں گی، اپ ڈیٹ فراہم کریں گے۔

راکٹ نے منصوبے کے مطابق فلوریڈا میں کیپ کیناویرل اسپیس فورس اسٹیشن سے پرواز کی اور یہ پہلی بار تھا کہ ایک پہلے استعمال شدہ بوسٹر کو دوبارہ استعمال کیا گیا۔ بوسٹر نے کامیابی کے ساتھ الگ ہونے کے بعد بحرِ اوقیانوس میں موجود پلیٹ فارم پر لینڈ بھی کیا۔تاہم سیٹلائٹ بنانے والی کمپنی AST SpaceMobileکے مطابق بلو برڈ 7نامی سیٹلائٹ کو اس کے مطلوبہ مدار کے مقابلے میں ایک کم اونچے مدار میں پہنچایا گیا۔

یاد رہے کہ ''نیو گلین'' نے پہلی بار جنوری 2025 میں خلا میں کامیابی سے پرواز کی تھی۔ اس کے بعد تقریباً 10 ماہ بعد اپنی دوسری مشن میں اس نے ناسا کے دو مریخی مداری خلائی جہاز بھی خلا میں روانہ کیے تھے۔’بلو اوریجن ‘کا مقصد ''نیو گلین '' نظام کے ذریعے ایلون مسک کی کمپنی ''اسپیس ایکس '' سے مقابلہ کرنا ہے، جو اس وقت کمرشل لانچ مارکیٹ میں نمایاں برتری رکھتی ہے، جیسا کہ جرمن خبر رساں ایجنسی نے رپورٹ کیا ہے۔

ہندوستھان سماچار

ہندوستان سماچار / Mohammad Khan