نئی دہلی، 16 اپریل (ہ س)۔ ساﺅتھ ویسٹ ڈسٹرکٹ کے سائبر پولیس اسٹیشن نے ایک بدنام سائبر مجرم کو گرفتار کیا ہے جو آن لائن ڈیٹنگ اور ازدواجی ایپس کے ذریعے خواتین کو نشانہ بنا کر کروڑوں روپے کا فراڈ کرچکاہے۔ گرفتار ملزم کی شناخت مغربی بنگال کے رہنے والے آنند کمار (35) کے طور پر کی گئی ہے۔ وہ جعلی شناختوں کا استعمال کرتے ہوئے خواتین کو محبت کے جال میںپھنساتا تھا اور پھر انہیں بلیک میل کرکے رقم بٹورتا تھا۔

ساﺅتھ ویسٹ ڈسٹرکٹ کے ڈپٹی کمشنر آف پولیس امیت گوئل نے جمعرات کو بتایا کہ ملزم نے اب تک ملک بھر میں 500 سے زیادہ خواتین کو نشانہ بنایا ہے اور تقریباً 2 کروڑ روپے کا دھوکہ دیا ہے۔ اس کی گرفتاری کے دوران، چار اسمارٹ فون، آٹھ سم کارڈ، تین ڈیبٹ کارڈ، اور دھوکہ دہی کی رقم سے خریدے گئے سونے کے چار کنگن اور پانچ سونے کی چین برآمد کی گئیں۔ ملزم کے خلاف اس سے قبل دہلی اور غازی آباد میں دو مقدمات درج ہیں۔

ڈپٹی کمشنر آف پولیس کے مطابق، یہ معاملہ اس وقت سامنے آیا جب ایک خاتون نے سائبر پولیس اسٹیشن میں شکایت درج کرائی جس میں الزام لگایا گیا کہ ویبھو اروڑہ نامی شخص نے اس سے شادی کا وعدہ کر کے تقریباً سات لاکھ روپے کا دھوکہ کیا ہے۔ ملزم نے پہلے ڈیٹنگ ایپ پر خاتون سے رابطہ کیا اور ایک باعزت فرد ظاہر کر کے اس کا اعتماد حاصل کیا۔ اس کے بعد اس نے انسٹاگرام اور پھر واٹس ایپ پر اس کے ساتھ بات چیت شروع کی۔ اس نے آہستہ آہستہ ایک جذباتی تعلق پیدا کیا اور اس سے شادی کرنے کا وعدہ کیا۔

اپنے آپ کو زیادہ معتبر ظاہر کرنے کے لیے، ملزم نے آنند کے نام سے ایک فرضی پروفائل بنائی، جس کے بارے میں اس نے دعویٰ کیا کہ وہ ایک قریبی دوست ہے۔ بعد ازاں اس نے میڈیکل ایمرجنسی اور کاروباری نقصان کا حوالہ دیتے ہوئے خاتون سے رقم بٹوری۔ جب خاتون نے اپنے پیسے واپس کرنے کا مطالبہ کیا تو ملزم نے رابطہ منقطع کر دیا اور ایک جھوٹا واٹس ایپ پیغام بھیجا جس میں دعویٰ کیا گیا کہ ویبھو کی موت ہو گئی ہے۔ کیس کی سنگینی کو دیکھتے ہوئے سائبر پولیس اسٹیشن سے ایک خصوصی ٹیم تشکیل دی گئی۔ ٹیم نے سوشل میڈیا اکاو¿نٹس، آئی پی لاگز، موبائل نمبرز اور بینک ٹرانزیکشنز کا اچھی طرح سے تجزیہ کیا۔ تکنیکی جانچ کے دوران ملزم کے موبائل نمبر مغربی بنگال کے 24 پرگنہ علاقے میں سرگرم پائے گئے۔ جس کے بعد پولیس ٹیم نے علاقے میں چھاپہ مار کر ملزم کو گرفتار کر لیا۔

تحقیقات سے پتہ چلا کہ ملزم متعدد جعلی شناختوں کے تحت سوشل میڈیا اکاو¿نٹس چلا رہا تھا، جن میں ویبھو اروڑہ، ڈاکٹر روہت بہل، ترون، آنند شرما، اور شیکھا شامل ہیں۔ وہ ڈاکٹر، وکیل، بزنس مین اور فلم پروڈیوسر ظاہر کر کے خواتین کو دھوکہ دیتا تھا۔

پولیس حکام کے مطابق ملزم پہلے خواتین سے دوستی کرتا، پھر جذباتی تعلق استوار کرتا اور نجی تصاویر اور ویڈیوز حاصل کرتا۔ بعد ازاں وہ ان تصاویر اور ویڈیوز کو وائرل کرنے کی دھمکی دے کر ان سے رقم بٹورتا تھا۔ وہ اس رقم کا ایک بڑا حصہ آن لائن گیمنگ اور ذاتی اخراجات پر خرچ کرتا۔ پولیس حکام کے مطابق ملزم متعدد سم کارڈز اور موبائل فون تبدیل کر کے اپنی شناخت چھپانے میں بہت ہوشیار تھا، جس سے اس کی گرفتاری کو چیلنج کیا جا رہا تھا۔ پولیس فی الحال معاملے کی مزید تفتیش کر رہی ہے اور دیگر متاثرین کی شناخت کرنے کی کوشش کر رہی ہے۔

---------------

ہندوستان سماچار / عبدالسلام صدیقی