ممبئی ، 14 اپریل (ہ س) ریاست مہاراشٹر میں 14 اپریل کے دن ڈاکٹر بابا صاحب امبیڈکر کے 135ویں یومِ پیدائش کے موقع پر مختلف شہروں میں بڑے پیمانے پر پروگرام منعقد کیے گئے، جن میں عوامی شرکت کے ساتھ سرکاری سطح پر بھی وسیع انتظامات دیکھنے میں آئے۔ ممبئی میں چیتیہ بھومی اس دن کا مرکزی مقام رہا، جہاں 13 اپریل اور 14 اپریل کے دوران ہزاروں افراد نے حاضری دی ۔اس کے علاوہ فضائی گلپوشی کا بھی اہتمام کیا گیا۔

ناگپور میں دیکشابھومی پر بھی بڑی تعداد میں لوگ جمع ہوئے، جو 1956 میں ڈاکٹر امبیڈکر کے بدھ مت اختیار کرنے سے منسلک تاریخی مقام ہے۔ یہاں روشنیوں، ثقافتی سرگرمیوں اور یادگاری پروگراموں کے ذریعے سماجی انصاف اور مساوات کے نظریات کو اجاگر کیا گیا۔

مہاراشٹر ٹورزم ڈپارٹمنٹ نے 13 اپریل اور 14 اپریل کو دو روزہ مفت ’’ڈاکٹر بابا صاحب امبیڈکر ٹور سرکٹ‘‘ کا انعقاد کیا، جس میں ممبئی، ناسک اور ناگپور کے اہم مقامات شامل کیے گئے۔ کونکن خطے میں ایک ہفتہ پر مشتمل ’’سماجی مساوات ہفتہ‘‘ بھی جاری ہے، جس میں آگاہی مہمات، لیکچرز اور آئین کی نقول کی تقسیم کی جا رہی ہے۔ ریاست کے مختلف شہروں میں ڈاکٹر امبیڈکر کے مجسموں کو سجایا اور روشنیوں سے مزین کیا گیا۔

ڈاکٹر بابا صاحب امبیڈکر کی پیدائش 14 اپریل 1891 کو مہو (ڈاکٹر امبیڈکر نگر) میں ہوئی تھی۔ انہوں نے ہندوستان کے جمہوری نظام کی تشکیل میں بنیادی کردار ادا کیا اور سماجی انصاف کے لیے اپنی جدوجہد کے باعث ایک نمایاں مقام حاصل کیا۔ ان کی جینتی کی تقریبات کا آغاز 1928 میں پونے سے ہوا تھا، جو اب مہاراشٹر بھر میں بڑے پیمانے پر منائی جاتی ہیں۔

ہندوستھان سماچار

--------------------

ہندوستان سماچار / جاوید این اے