نئی دہلی، 14 اپریل (ہ س): صدر جمہوریہ دروپدی مرمو، نائب صدر جمہوریہ سی پی رادھا کرشنن اور لوک سبھا کے اسپیکر اوم برلا نے کئی دیگر رہنماو¿ں کے ساتھ بابا صاحب ڈاکٹر بھیم راو¿ امبیڈکر کو ان کی 136 ویں یوم پیدائش پر خراج عقیدت پیش کیا،بابا صاحب ہندوستانی آئین کی مسودہ سازی کمیٹی کے چیئرمین تھے،۔

صدر جمہوریہ مرمو نے منگل کے روز سوشل میڈیا پلیٹ فارم ایکس پر پوسٹ کرتے ہوئے لکھا کہ بابا صاحب امبیڈکر ایک وکیل، ماہر اقتصادیات، ایک شاندار مفکر، ایک قانون داں، اور مساوات پر مبنی سماجی نظام کے طاقتور نمائندہ تھے۔ انہوں نے اپنی زندگی بھر معاشرے کے محروم اور کمزور طبقات کی بہتری کے لیے جدوجہد کی اور ان کے مقصد میں تاریخی شراکت کی۔ انہوں نے نہ صرف عدم مساوات کو ختم کرنے کا راستہ دکھایا بلکہ ہندوستان کی جمہوری اقدار اور آئینی حقوق کو مضبوط کرنے میں بھی قائدانہ کردار ادا کیا۔ باباصاحب نے خواتین کی تعلیم اور ان کے حقوق کو ترجیح دی۔ ان کی کثیر جہتی شراکتیں آنے والی نسلوں کو ملک کی خدمت اور ترقی میں فعال کردار ادا کرنے کی ترغیب دیتی رہیں گی۔

نائب صدرجمہوریہ سی پی رادھا کرشنن نے راشٹرپتی بھون میں بابا صاحب ڈاکٹر بی آر امبیڈکر کو ان کی یوم پیدائش پر خراج عقیدت پیش کیا۔

لوک سبھا اسپیکر اوم برلا نے ایوان دستور کے سنٹرل ہال میں بھارت رتن باباصاحب ڈاکٹر امبیڈکر کو ان کی یوم پیدائش پر خراج عقیدت پیش کرتے ہوئے کہا کہ باباصاحب کی پوری زندگی ہمیشہ راستہ دکھائے گی۔

وزیر داخلہ امت شاہ نے کہا کہ بابا صاحب امبیڈکر نے سماج کے ہر طبقے کو مساوی حقوق اور مواقع کی آزادی دے کر ہماری جمہوریت کی مضبوط بنیاد رکھی۔ انہوں نے ملکی سالمیت کی خاطر دفعہ 370 کی شدید مخالفت کی۔ سماج کو تعلیم اور اتحاد کا منتر دینے والے باباصاحب کی زندگی ہمیں سکھاتی ہے کہ جب عزم قوم کی خدمت اور عوام کی فلاح کا ہو تو ہر رکاوٹ چھوٹی ہو جاتی ہے۔

روڈ ٹرانسپورٹ اور ہائی ویز کے وزیر نتن گڈکری نے ایک ایکس پوسٹ میں لکھا، ہندوستانی آئین کے معمار، بہوجن رہنما، عظیم سماجی مصلح اور انقلابی عظیم انسان ڈاکٹر امبیڈکر کو ان کی یوم پیدائش پر سلام۔

وزیر دفاع راج ناتھ سنگھ نے کہا کہ بابا صاحب نے اپنی پوری زندگی سماج میں مساوات اور ہم آہنگی کو فروغ دینے کے لیے کام کیا۔ ان کی پوری زندگی پسماندہ افراد کے مساوی حقوق کو یقینی بنانے کے لیے وقف تھی۔ باباصاحب ایک عظیم مفکر اور ملک کے کئی اداروں کے معمار تھے۔ ناسازگار حالات میں بھی باباصاحب نے غیر معمولی کارنامے انجام دیے اور قوم کی تعمیر میں انمٹ حصہ ڈالا۔

کانگریس کے قومی صدر ملکارجن کھڑگے نے باباصاحب ڈاکٹر امبیڈکر کے یوم پیدائش پر کہا، ہم اس بصیرت کو دل کی گہرائیوں سے خراج عقیدت پیش کرتے ہیں جس نے ہندوستان کو اس کی اخلاقی اور آئینی روح دی۔ باباصاحب نہ صرف ہندوستان کے آئین کے معمار تھے بلکہ آزادی، مساوات اور انصاف کے نمایاں نمائندہ بھی تھے۔ آج بھی ان کے الفاظ اور انتباہات گونج رہے ہیں۔

لوک سبھا میں قائد حزب اختلاف راہل گاندھی نے کہا کہ ڈاکٹر امبیڈکر نے ہمیں نہ صرف آئین دیا بلکہ انصاف، مساوات اور احترام پر مبنی مضبوط ہندوستان کا خواب دیا۔ یہ ملک بابا صاحب کے نظریات پر بنا تھا۔ میں اپنی آخری سانس تک ان کی حفاظت کے لیے اپنی پوری طاقت سے لڑوں گا۔ ہم مل کر بابا صاحب کے خوابوں کے ہندوستان کو دوبارہ بنائیں گے۔

ڈاکٹر امبیڈکر 14 اپریل 1891 کو پیدا ہوئے تھے۔ وہ ہندوستانی آئین ساز کمیٹی کے چیئرمین ، ایک مشہور قانون دان، اور ایک سماجی مصلح تھے۔ انہوں نے پسماندہ طبقات کے حقوق کے لیے نمایاں جدوجہد کی۔

---------------

ہندوستان سماچار / عبدالسلام صدیقی