مختلف شعبوں میں نمایاں کامیابی حاصل کرنے والی خواتین شامل ہوں گی

خواتین کی سیاسی شراکت داری اور ان کے جمہوری حقوق کو نئی بلندیاں ملیں گی: وزیراعلیٰ ڈاکٹر یادو

بھوپال، 14 اپریل (ہ س)۔ مدھیہ پردیش میں ’’ناری شکتی وندن پکھواڑا‘‘ کے تحت بدھ، 15 اپریل کو شام 4.00 بجے بھوپال میں واقع رویندر بھون میں ریاستی سطح کا اہم پروگرام منعقد ہوگا۔ اس دوران ’’خواتین کی قیادت کا سفر‘‘ کے موضوع پر ایک خصوصی نمائش بھی لگائی جائے گی، جو خواتین کی طاقت کی شاندار تاریخ اور مستقبل کے امکانات کو ظاہر کرے گی۔

ریاست کے وزیراعلیٰ ڈاکٹر موہن یادو نے کہا ہے کہ مدھیہ پردیش میں خواتین کی سیاسی شراکت داری اور ان کے جمہوری حقوق کو نئی بلندیوں تک پہنچانے کے لیے ریاستی حکومت کی جانب سے تاریخی قدم اٹھایا جارہا ہے۔ وزیراعظم نریندر مودی کی قیادت میں منظور شدہ ’ناری شکتی وندن ادھینیم‘ کے بنیادی مقصد کو زمین پر اتارنے کی غرض سے پوری ریاست میں 10 سے 25 اپریل تک ’’ناری شکتی وندن پکھواڑا‘‘ منایا جا رہا ہے۔ اسی سلسلے میں یہ ریاستی سطح کا اہم پروگرام ہوگا۔

رابطہ عامہ افسر بندو سنیل نے منگل کو معلومات دیتے ہوئے بتایا کہ اس پروقار تقریب میں وزیراعلیٰ ڈاکٹر یادو شامل ہوں گے اور نظامِ حکومت میں خواتین کی براہِ راست شراکت کو یقینی بنانے اور پالیسی سازی کے عمل میں ان کے کردار کو مضبوط بنانے پر خصوصی تبادلہ خیال کریں گے۔ وزیراعلیٰ ڈاکٹر یادو اس موقع پر ریاست کی خواتین سے خطاب بھی کریں گے اور حکومت کے اس عزم کو دہرائیں گے جس کے تحت مدھیہ پردیش کے جمہوری اداروں میں خواتین کی آواز مزید توانا ہوگی۔

پروگرام میں خواتین کو بااختیار بنانے کی سمت میں سرگرم ریاست کی ممتاز خاتون رہنما شامل ہوں گی۔ تقریب میں وزیر برائے خواتین و اطفال ترقیات نرملا بھوریا، وزیر برائے پبلک ہیلتھ انجینئرنگ محترمہ سمپتیا اوئیکے، ریاستی وزیر (آزادانہ چارج) محترمہ کرشنا گور، ریاستی وزیر محترمہ پرتیبھا باگری اور محترمہ رادھا سنگھ سمیت ممتاز ماہرِ تعلیم شوبھا پیٹھنکر کی خصوصی موجودگی رہے گی۔

تقریب میں مختلف شعبوں میں نمایاں کامیابی حاصل کرنے والی خواتین کو مدعو کیا گیا ہے۔ اس میں پدم شری سے سرفراز شخصیات، خاتون ڈاکٹر، وکلاء، فنکار اور انجینئرز شامل ہوں گی۔ ساتھ ہی، معاشرے کے دھارے کو تیز کرنے والی لاڈلی بہنا، لاڈلی لکشمی، سیلف ہیلپ گروپس کی ارکان، میدانی سطح پر کام کرنے والی نگراں (سپروائزر) اور پروجیکٹ افسر اور خواتین میڈیا نمائندے بھی اس پروگرام کا لازمی حصہ بنیں گے۔

اس پکھواڑے کے دوران نہ صرف بھوپال بلکہ پوری ریاست میں عوامی بیداری کی مہمات چلائی جا رہی ہیں۔ ڈاکٹر بھیم راؤ امبیڈکر کے یومِ پیدائش پر ریاست کی تمام گرام پنچایتوں میں خصوصی گرام سبھا منعقد ہو رہی ہیں، جن میں ’ناری شکتی وندن ادھینیم‘ کی اہمیت پر دیہی خواتین کے ساتھ مکالمہ ہوا۔ ساتھ ہی ہر اسمبلی اور لوک سبھا حلقے میں ’ناری شکتی پد یاترا‘ اور تعلیمی اداروں میں ’یوتھ ڈائیلاگ‘ جیسے پروگراموں کے ذریعے نوجوان نسل کو اس سماجی تبدیلی سے جوڑا جا رہا ہے۔ حکومت کا ماننا ہے کہ خواتین کی فیصلہ سازی کی صلاحیت میں اضافے سے نہ صرف سماجی شعور بیدار ہوگا بلکہ عوامی اعتماد بھی مزید گہرا ہوگا۔

ہندوستھان سماچار

---------------

ہندوستان سماچار / انظر حسن