نئی دہلی، 11 اپریل (ہ س)۔ مغربی ایشیا کے بحران کے درمیان، تجارت اور صنعت کے وزیر پیوش گوئل نے ہفتہ کو سعودی عرب کے وزیر تجارت ڈاکٹر ماجد بن عبداللہ القصبی کے ساتھ ورچوئلذریعہ سے بات چیت کی۔ میٹنگ کے دوران موجودہ سپلائی چین کے تسلسل کو یقینی بنانے پر توجہ دی گئی۔

وزارت تجارت اور صنعت نے ایک بیان میں کہا کہ پیوش گوئل نے آج سعودی عرب کے وزیر تجارت ڈاکٹر ماجد بن عبداللہ القصبی کے ساتھ ورچوئل بات چیت کی اور امید ظاہر کی کہ حال ہی میں اعلان کردہ جنگ بندی خطے میں دیرپا امن اور سلامتی کی راہ ہموار کرے گی۔

وزارت نے بتایا کہ بات چیت کے دوران، انہوں نے سعودی عوام کی بے مثال ہمت کو سراہا، جو بڑھتی ہوئی رکاوٹوں اور عدم استحکام کے درمیان سپلائی چین کی سالمیت کو برقرار رکھنے کے اپنے عزم پر ثابت قدم رہے۔ گوئل نے جاری تنازعہ کے دوران ملک میں ہونے والے حملوں کی بھی مذمت کی اور ہندوستانی برادری کے تحفظ کے لیے سعودی عرب کی کوششوں کی تعریف کی۔

وزارت تجارت نے کہا کہ بات چیت کے دوران، دونوں فریقوں نے تنازعہ نے علاقائی سپلائی چین پر پڑنے والے تناؤ کا ذکر کیا اور ہموار تجارتی تسلسل کو یقینی بنانے کے لیے مربوط کوششوں کے ذریعے جلد از جلد معمول کو بحال کرنے کی ضرورت پر زور دیا۔ گوئل نے سعودی عرب اور خلیجی خطہ میں برآمدات کو فروغ دینے کے لیے ہندوستان کی طرف سے اٹھائے گئے اقدامات پر روشنی ڈالی۔

وزراءنے دوطرفہ تجارت کو مضبوط بنانے کے اپنے عزم کا اعادہ کیا اور ہندوستان-جی سی سی آزادانہ تجارتی معاہدے کے مذاکرات میں جلد پیش رفت کی امید ظاہر کی۔ بات چیت میں ہندوستان-سعودی عرب اقتصادی شراکت داری کو مزید گہرا کرنے کے مشترکہ عزم پر زور دیا گیا۔

ہندوستھان سماچار

ہندوستان سماچار / محمد شہزاد