تہران، یکم اپریل (ہ س) ایران کے وزیر خارجہ عباس عراقچی نے ایک جرات مندانہ دعویٰ کرتے ہوئے کہا ہے کہ ایران امریکہ اور اسرائیل کے ساتھ طویل عرصے تک جاری تنازعے کو جاری رکھنے کے لیے تیار ہے۔ تہران کم از کم چھ ماہ تک جنگ لڑنے کی صلاحیت رکھتا ہے اور وہ اپنی جوابی فوجی کارروائی جاری رکھے گا۔

نیم سرکاری خبر رساں ادارے تسنیم کے مطابق، الجزیرہ کے ساتھ ایک انٹرویو میں عراقچی نے کہا کہ ایران اپنے دشمنوں کی طرف سے مقرر کردہ کسی بھی ڈیڈ لائن کو قبول نہیں کرتا اور اپنے تحفظ کے لیے ہر ممکن اقدامات کرتا رہے گا۔

انہوں نے امریکا کے ساتھ مذاکرات کے دعووں کو مسترد کرتے ہوئے کہا کہ فی الحال ایران اور امریکا کے درمیان کوئی باضابطہ بات چیت نہیں ہورہی ہے۔ تاہم دونوں ممالک کے درمیان بلاواسطہ اور بلواسطہ پیغامات کا تبادلہ جاری ہے جسے مذاکرات نہیں کہا جا سکتا۔

ایران کے وزیر خارجہ نے کہا کہ کسی بھی ممکنہ مذاکرات کا فیصلہ ایران کی اعلیٰ قیادت کرے گی اور اس کا بنیادی مقصد ملک کے مفادات کا تحفظ ہو گا۔ انہوں نے زور دے کر کہا کہ ایران صرف عارضی جنگ بندی نہیں بلکہ پورے خطے میں پائیدار امن اور دشمنی کا مکمل خاتمہ چاہتا ہے۔

آبنائے ہرمز کے بارے میں ان کا کہنا تھا کہ یہ فی الحال کھلی ہے لیکن جنگ کی صورت میں دشمن ممالک کے جہازوں کو اس کے ذریعے آنے کی اجازت نہیں ہوگی۔ انہوں نے خبردار کیا کہ ایران کسی قسم کی دھمکی یا انتباہ قبول نہیں کرے گا۔

وزیر خارجہ نے اس بات کا بھی اعادہ کیا کہ ایران نے ابھی تک امریکہ کی 15 نکاتی تجویز کا جواب نہیں دیا۔ انہوں نے ان خبروں کو بھی واضح طور پر مسترد کیا کہ ایران نے پانچ شرائط رکھی تھیں۔ انہوں نے ان خبروں کو میڈیا کی قیاس آرائیاں قرار دیتے ہوئے اس بات کا اعادہ کیا کہ ابھی تک امریکی تجویز کا کوئی جواب نہیں دیا گیا ہے۔ ایران اس سلسلے میں کئی پہلوو¿ں پر غور کر رہا ہے۔ وزیر خارجہ نے واضح کیا کہ جنگ کے خاتمے کے لیے ایران کی شرائط پوری طرح واضح ہیں۔

ایران کے بنیادی ڈھانچے اور توانائی کے وسائل پر حملے کی دھمکیوں کے بارے میں عراقچی نے کہا کہ ایران کو کئی بار آزمایا گیا ہے اور وہ کسی بھی قسم کے 'الٹی میٹم' کو قبول نہیں کرتا ہے۔

آبنائے ہرمز کے بارے میں، عراقچی نے کہا کہ یہ ایران اور عمان کے اندرونی پانیوں میں آتا ہے، بین الاقوامی پانیوں میں نہیں۔ اس لیے دونوں ممالک کے مفادات کو مدنظر رکھنا ضروری ہے۔ انہوں نے مزید کہا کہ آبنائے اس وقت کھلا ہے لیکن ایران کے ساتھ جنگ میں ممالک کے جہازوں کے لیے بند ہے۔

اس وباءکے باب المندب اور بحیرہ احمر تک پہنچنے کے امکانات کے بارے میں انہوں نے کہا کہ یہ معاملہ خطے کے ممالک بالخصوص یمن کے لیے تشویش کا باعث ہے جن کی اپنی پالیسیاں ہیں۔ انہوں نے مزید کہا کہ اگر ایسی جماعتیں کارروائی کرنے کا فیصلہ کرتی ہیں تو یہ ان کا اپنا فیصلہ ہوگا۔ انہوں نے زور دے کر کہا کہ ایران کسی سے امداد کی توقع نہیں رکھتا اور اپنے دفاع کی صلاحیت رکھتا ہے۔

---------------

ہندوستان سماچار / عبدالسلام صدیقی