نئی دہلی، 1 اپریل (ہ س): ریلوے کے وزیر اشونی وشنو نے دہلی اسمبلی کے اسپیکر وجیندر گپتا کو خط لکھ کر مطلع کیا ہے کہ متعلقہ ریلوے حکام کو بادلی ریلوے اسٹیشن پر ریلوے اوور برج (آر او وی) سائٹ کا معائنہ کرنے کی ہدایت دی گئی ہے۔ گپتا نے بدھ کو ایک پریس ریلیز میں یہ جانکاری دی۔

ریلیز کے مطابق، یہ فوری کارروائی وجیندر گپتا کی طرف سے وزیر ریلوے کو لکھے گئے خط کے بعد کی گئی ہے، جس میں انہوں نے بادلی کے علاقے میں شدید ٹریفک جام کا مسئلہ اٹھایا اور ریلوے اوور برج (آر او بی) کی تعمیر کی فوری ضرورت پر زور دیا۔ مجوزہ آر او بی بادلی ریلوے اسٹیشن اور روہنی سیکٹر-18 میٹرو اسٹیشن (ٹی پوائنٹ) کے درمیان ایک اہم رابطہ قائم کرے گا، جس سے ٹریفک کی بھیڑ میں کمی آئے گی اور روزانہ مسافروں کے سفر میں سہولت ہوگی۔

وزیر ریلوے کو اپنی رپورٹ میں وجیندر گپتا نے بادلی کے ایم ایل اے اہیر دیپک چودھری کے ایک خط کا بھی حوالہ دیا۔ انہوں نے بتایا کہ علاقے میں موجودہ انڈر پاس کئی دہائیوں پرانا ہے اور اس وقت کی کم آبادی کے لیے بنایا گیا تھا۔ آج کی بڑھتی ہوئی آبادی اور گاڑیوں کی زیادہ تعداد کے باعث یہ انڈر پاس ٹریفک کے بوجھ کو سنبھالنے سے مکمل طور پر قاصر ہے۔

گپتا نے وزیر ریلوے کو آگاہ کیا کہ روہنی کے رہائشی جو صنعتی اور رہائشی علاقوں جیسے سمے پور، سراسپور اور لباسپور میں کام کرتے ہیں انہیں روزانہ 2 سے 3 گھنٹے تک ٹریفک جام کا سامنا کرنا پڑتا ہے۔

اسپیکر نے اس بات پر زور دیا کہ اس ریلوے اوور برج کی تعمیر سے نہ صرف مقامی باشندوں کو فائدہ پہنچے گا بلکہ یو ای آر-II (اربن ایکسٹینشن روڈ) اور قومی شاہراہوں کے ساتھ رابطہ بھی مضبوط ہوگا۔ انہوں نے درخواست کی کہ اس منصوبے کو عوامی مفاد میں ترجیحی بنیادوں پر مکمل کیا جائے جسے وزارت ریلوے نے مثبت طور پر قبول کرتے ہوئے کارروائی کا آغاز کر دیا ہے۔

---------------

ہندوستان سماچار / عبدالسلام صدیقی