نئی دہلی، یکم اپریل (ہ س)۔ ملک میں مجموعی سامان اور خدمات ٹیکس (جی ایس ٹی) کی وصولی مسلسل مستحکم ہو رہی ہے۔ جی ایس ٹی ریونیو کی وصولی مارچ میں 8.8 فیصد بڑھ کر ₹ 2 لاکھ کروڑ سے تجاوز کر گئی، جو گزشتہ سال مارچ میں ₹ 1.83 لاکھ کروڑ تھی۔

جی ایس ٹی کے ڈائریکٹوریٹ جنرل نے بدھ کو جاری کردہ اعداد و شمار میں کہا کہ مارچ میں مجموعی سامان اور خدمات ٹیکس (جی ایس ٹی) کی آمدنی میں یہ اضافہ گھریلو فروخت اور درآمدات سے ٹیکس وصولیوں میں اضافہ کی وجہ سے ہوا ہے۔ مارچ میں جی ایس ٹی کی مجموعی آمدنی بڑھ کر 2,00,064 کروڑ ہو گئی، جو مارچ 2025 میں 1,83,845 کروڑ سے 8.8 فیصد زیادہ ہے۔ مارچ میں گھریلو محصولات 5.9 فیصد بڑھ کر 1.46 لاکھ کروڑ سے زیادہ ہو گئیں، جبکہ درآمدی محصولات 17.8 فیصد بڑھ کر16 کروڑ ہو گئیں۔ اعداد و شمار کے مطابق مارچ کے دوران جاری کردہ ریفنڈ کی رقم 13.8 فیصد بڑھ کر 22,074 کروڑ روپے ہوگئی۔ ریفنڈ کے لیے ایڈجسٹ کرنے کے بعد خالص جی ایس ٹی ریونیو کلیکشن تقریباً 1.78 لاکھ کروڑ روپے رہا، جو سال بہ سال کی بنیاد پر 8.2 فیصد کا اضافہ ظاہر کرتا ہے۔

اسکے علاوہ پورے مالی سال 26-2025 (اپریل-مارچ) کے لیے مجموعی جی ایس ٹی محصول کی وصولی 8.3 فیصد بڑھ کر 22.27 لاکھ کروڑ روپے سے زیادہ ہوگئی۔ ریفنڈ کے لیے ایڈجسٹ کرنے کے بعد خالص ریونیو کلیکشن 7.1 فیصد بڑھ کر 19.34 لاکھ کروڑ روپے ہو گیا۔ اس سے درآمدی سرگرمیوں میں اضافہ اور کسٹمز کی بہتر وصولی کی نشاندہی ہوتی ہے۔

ہندوستھان سماچار

---------------

ہندوستان سماچار / عبدالواحد