نئی دہلی، یکم اپریل (ہ س)۔ دہلی پولیس کی کرائم برانچ کے اینٹی گینگسٹر اسکواڈ (اے جی ایس) نے دوارکا کے نانگلی علاقے سے مکھیا گینگ کے بدنام لیڈر راہل عرف دہور عرف راجو مکھیا (38) کو گرفتار کیا ہے۔ ملزم تین مقدمات میں مفرور تھا اور مسلسل عدالت میں پیشی سے گریز کرتا رہا۔

ڈپٹی کمشنر آف پولیس (کرائم برانچ) ہرش اندورا نے بدھ کو بتایا کہ بہار کے مدھوبنی کا رہنے والا راہل مکھیا دہلی اور ہریانہ میں درج چار مجرمانہ مقدمات میں ملوث تھا۔ گرفتاری سے قبل وہ ضمانت پر رہا لیکن بار بار عدالت میں پیشی سے گریز کیا۔ ایک خفیہ اطلاع پر کارروائی کرتے ہوئے، کرائم برانچ کی ٹیم نے جال بچھا کر اسے 30 مارچ کو گرفتار کیا۔ تحقیقات سے پتہ چلا ہے کہ مکھیا گینگ اپنے جرائم کو انتہائی نفیس طریقے سے انجام دیتا ہے۔ گینگ کے ارکان نے سب سے پہلے پلیسمنٹ ایجنسیوں کے ذریعے متمول خاندانوں میں گھس کر گھریلو ملازموں یا نوکرانیوں کا روپ دھارا۔ اعتماد حاصل کرنے کے بعد، انہوں نے گھر کے افراد کے روزمرہ کے معمولات اور قیمتی چیزوں کے بارے میں معلومات اکٹھی کیں۔ پھر، مناسب موقع ملنے پر، وہ دوسرے ساتھیوں کو چوری کے ارتکاب کے لیے بلا لیتے۔

ڈپٹی کمشنر آف پولیس کے مطابق راہل 2016 میں راجوری گارڈن میں ایک ڈاکٹر کے گھر سے 25-30 لاکھ روپے کی چوری اور گروگرام میں 2014 میں تقریباً 1 کروڑ روپے کی چوری میں بھی ملوث تھا۔ ایک کیس میں، متاثرہ کو نشہ آور چیز دی گئی اور اسے بے ہوش کر دیا گیا۔ پولیس پوچھ گچھ کے دوران ملزم نے انکشاف کیا کہ اس نے 2006 سے 2011 کے درمیان بطور نگراں کام کیا، جب اس نے اپنے ساتھیوں کے ساتھ مل کر چوری کی منصوبہ بندی شروع کی۔ بعد میں، اس نے مختلف ریاستوں میں گھریلو ملازموں کا نیٹ ورک قائم کیا اور بڑے پیمانے پر چوری کی وارداتیں کیں۔ کرائم برانچ کے حکام کا کہنا ہے کہ ملزم کی گرفتاری سے کئی زیر التوا مقدمات کے حل ہونے کی امید ہے۔ اس سے فی الحال مکمل پوچھ گچھ کی جارہی ہے اور اس کے دیگر ساتھیوں کی تلاش جاری ہے۔

---------------

ہندوستان سماچار / عبدالسلام صدیقی