۔خواتین کے ڈاؤن ہِل اسٹینڈنگ مقابلے میں روس کی تاریخی واپسی

کورتینا دامپتزو، 7 مارچ (ہ س)۔ روس نے ہفتہ کو پیرالمپکس گیمز میں 12 سال میں اپنا پہلا تمغہ جیت کر تاریخ رقم کی۔ اٹلی کے شہر کورتینا میں ہونے والے خواتین کے ڈاؤن ہل اسٹینڈنگ مقابلے میں روسی ایتھلیٹ وروارا وورونچیخینا نے کانسے کا تمغہ جیتا۔

یہ حصولیابی اس لئے بھی خاص سمجھی جارہی ہے کیونکہ یہ 2014 کے بعد پیرالمپکس گیمز میں روس کا پہلا تمغہ ہے۔ روس اور یوکرین کے درمیان جاری جنگ کے باوجود، بین الاقوامی پیرا اولمپک کمیٹی (آئی پی سی ) نے چھ روسی کھلاڑیوں اور ان کے اتحادی ملک بیلاروس کے چار کھلاڑیوں کو اپنے اپنے قومی پرچموں کے نیچے مقابلے میں حصہ لینے کی اجازت دی ہے۔ اس سے قبل ان ایتھلیٹس کو کئی بین الاقوامی مقابلوں میں نیوٹرل ایتھلیٹس کے طور پر حصہ لینا پڑتا تھا۔

آئی پی سی کے اس فیصلے کی کچھ ممالک نے مخالفت کی تھی ۔ یوکرین سمیت سات ممالک نے جمعہ کو ہونے والی افتتاحی تقریب کا بائیکاٹ کیا۔ ویرونا ایرینا میں پریڈ کے دوران روس کے دستے کو کچھ تماشائیوں کی طرف سے ہوٹنگ کا سامنا بھی کرنا پڑا۔

ان تنازعات کے درمیان، روس کی وروارانے شاندار کارکردگی کا مظاہرہ کرتے ہوئے خواتین ڈاون ہل اسٹینڈنگ کے زمرے میں کانسے کا تمغہ جیت کر اپنے ملک کو پیرالمپکس میں ایک طویل عرصے کے بعد تمغہ دلایا۔

اس کامیابی کو روس کے لیے ایک اہم واپسی کے طور پر دیکھا جا رہا ہے، جس نے برسوں بعد پیرالمپکس اسٹیج پر اپنی موجودگی کا احساس دلایا ہے۔

ہندوستھان سماچار

ہندوستان سماچار / محمد شہزاد