نئی دہلی، 31 مارچ (ہ س)۔ آج شری مہاویر جینتی کی چھٹی ہونے کی وجہ سے گھریلو شیئر بازار میں کوئی کاروبار نہیں ہو رہا ہے۔ شیئر بازار کی طرح ہی کموڈٹی مارکیٹ میں بھی آج دن کے ٹریڈنگ سیشن یعنی صبح 9 بجے سے شام 5 بجے تک شری مہاویر جینتی کی تعطیل رہے گی۔ تاہم شام کے سیشن میں یعنی شام 5 بجے سے رات 11.55 بجے تک کموڈٹی مارکیٹ میں معمول کا کاروبار ہوگا۔
اس ہفتے آج کے بعد جمعہ یعنی 3 اپریل کو گڈ فرائیڈے کی وجہ سے شیئر بازار میں تعطیل رہے گی۔ اس طرح موجودہ ہفتے میں صرف تین دن ہی شیئر بازار میں کاروبار ہونے والا ہے۔ ان میں کل یعنی پیر کو ایک دن کا کاروبار ہو چکا ہے، جبکہ بدھ اور جمعرات کو کاروبار ہونا باقی ہے۔ اس سے پہلے جمعہ یعنی 27 مارچ کو ختم ہونے والے کاروباری ہفتے کے دوران بھی گھریلو شیئر بازار میں رام نومی کی چھٹی کے باعث صرف چار دن ہی کاروبار ہوا تھا۔
شیئر بازار کے ذریعے جاری کردہ ہالیڈے کیلنڈر کے مطابق سال 2026 میں جنوری سے لے کر دسمبر تک ہفتہ اور اتوار کی ہفتہ وار چھٹیوں کے علاوہ کل 16 دن چھٹی کا اعلان کیا گیا ہے۔ پورے سال کے دوران سب سے زیادہ چھٹیاں مارچ کے مہینے میں دی گئی ہیں۔ مارچ کے مہینے میں 3 مارچ کو ہولی کی چھٹی تھی، جبکہ 26 مارچ کو رام نومی کی چھٹی تھی۔ اس کے بعد مارچ کے آخری دن یعنی آج شری مہاویر جینتی کی وجہ سے شیئر بازار میں چھٹی ہے۔
مارچ کے بعد 3 اپریل کو گڈ فرائیڈے کی چھٹی رہے گی، جبکہ 14 اپریل کو ڈاکٹر بابا صاحب امبیڈکر جینتی کی وجہ سے شیئر بازار بند رہے گا۔ اسی طرح یکم مئی کو مہاراشٹر ڈے کے باعث شیئر بازار میں کوئی کاروبار نہیں ہوگا، جبکہ 28 مئی کو شیئر بازار میں عید الاضحیٰ کی چھٹی رہے گی۔ جون کے مہینے میں صرف ایک دن 26 جون کو عاشورہ (محرم) کی وجہ سے شیئر بازار میں کاروبار نہیں ہوگا۔
اس ہالیڈے کیلنڈر کے مطابق جولائی اور اگست میں شیئر بازار میں ہفتہ وار چھٹیوں کے علاوہ اور کوئی چھٹی نہیں ہوگی۔ ستمبر کے مہینے میں 14 تاریخ کو گنیش چترتھی کی چھٹی ہوگی، جبکہ اکتوبر کے مہینے میں 2 تاریخ کو مہاتما گاندھی جینتی کی وجہ سے شیئر بازار میں کوئی کاروبار نہیں ہوگا۔ اسی مہینے 20 تاریخ کو شیئر بازار میں دسہرہ کی چھٹی ہوگی، جبکہ 10 نومبر کو دیوالی اور بلی پرتی پدا کی وجہ سے شیئر بازار میں چھٹی رہے گی۔ نومبر کے مہینے میں 24 تاریخ کو شری گرو نانک دیو گر پورب کی چھٹی رہے گی۔ اسی طرح سال کے آخری مہینے دسمبر میں 25 تاریخ کو کرسمس کی چھٹی رہے گی۔
ہندوستھان سماچار
---------------
ہندوستان سماچار / انظر حسن
