وزیراعظم مودی آج مغربی ایشیا کے بحران پر وزرائے اعلیٰ سے بات کریں گے

نئی دہلی، 27 مارچ (ہ س)۔ وزیراعظم نریندر مودی آج مغربی ایشیا کے بحران سے پیدا ہونے والی صورتحال پر تمام ریاستوں کے وزرائے اعلیٰ (پانچ انتخابی ریاستوں کو چھوڑ کر) سے ویڈیو کانفرنسنگ کے ذریعے بات کریں گے۔ وہ ریاستوں سے ان کی تیاریوں پر تبادلہ خیال کریں گے کہ کس طرح جنگ کے ممکنہ مضر اثرات سے عام لوگوں کو محفوظ رکھا جائے۔

وزیراعظم کی شام کو ہونے والی یہ گفتگو اس لیے خاص ہے کہ خلیجی خطے میں تنازعہ شروع ہونے کے بعد ان کی وزرائے اعلیٰ کے ساتھ پہلی میٹنگ ہوگی۔ کیبنٹ سکریٹریٹ انتخاب والی ریاستوں تمل ناڈو، مغربی بنگال، آسام، کیرالہ اور مرکز کے زیرِ انتظام علاقے پڈوچیری کے چیف سکریٹریوں کے ساتھ الگ الگ میٹنگ کرے گا۔

اس پہل کا مقصد ’’ٹیم انڈیا‘‘ کے جذبے سے متاثر ہو کر حکومت کی کوششوں میں ہم آہنگی کو یقینی بنانا ہے۔ وزیراعظم مودی ایران کے تنازعہ سے پیدا ہونے والے بحران پر مسلسل سرگرم ہیں۔ پیر کو انہوں نے لوک سبھا کے ارکان کو اس سلسلے میں اٹھائے جا رہے اقدامات کی معلومات دی۔ منگل کو راجیہ سبھا کو اس بارے میں خطاب کیا۔ بدھ کو کل جماعتی اجلاس میں ان کے سینئر وزراء نے اپوزیشن کی تمام جماعتوں کے سوالات کے جوابات دیے۔ چونکہ تیل اور گیس کی سپلائی سے نمٹنے میں ریاستوں کا اہم کردار ہے، اس لیے اس بارے میں اب وزیراعظم مودی وزرائے اعلیٰ سے تبادلہ خیال کریں گے۔

وزیراعظم اس سے قبل پیغام دے چکے ہیں، ’’مغربی ایشیا کا بحران کب تک چلے گا، اس پر غیر یقینی کی دھند چھائی ہوئی ہے۔ ایسے میں مرکزی حکومت جنگ کے اثرات کو کم سے کم کرنے کے لیے ٹھوس اقدامات کرنے میں مصروف ہے۔ تمام ریاستی حکومتوں کو مرکزی حکومت کے ساتھ مل کر ٹیم انڈیا کے طور پر کام کرنا ہوگا۔‘‘

ہندوستھان سماچار

---------------

ہندوستان سماچار / انظر حسن