نئی دہلی، 25 مارچ (ہ س): چیف جسٹس سوریہ کانت بدھ کو ایک سماعت کے دوران برہم ہوگئے۔ کیس میں پہلے کے حکم کے بعد ایک شخص نے اپنے بھائی کو فون کیا اور پوچھا کہ چیف جسٹس ایسا حکم کیسے جاری کر سکتے ہیں۔ سماعت کے دوران چیف جسٹس نے ہریانہ حکومت کے وکیل کی سرزنش کی اور توہین عدالت کی کارروائی کی دھمکی دی۔

چیف جسٹس نے استفسار کیا کہ اس شخص کی ہمت کیسے ہوئی کہ مجھے بھائی کہے، کیا اب وہ مجھے ڈکٹیٹ کرے گا، چاہے وہ بھارت سے باہر کہیں چھپا ہوا ہو، میں جانتا ہوں کہ ایسے لوگوں سے کیسے نمٹا جائے، میں گزشتہ 23 سال سے ان سے نمٹ رہا ہوں۔ درحقیقت، ہریانہ سے تعلق رکھنے والے بھائی اور بہن نکھل پونیا اور ایکتا پونیا نے پی جی میڈیکل کورسس میں داخلہ کے لیے بدھ اقلیتی سرٹیفکیٹ کے تحت فوائد مانگے تھے۔ 28 جنوری کو سماعت کے دوران چیف جسٹس کی سربراہی میں بنچ نے سخت اعتراض ظاہر کیا اور اسے ایک نئی قسم کی فراڈ قرار دیا۔

درخواست گزار نے اقلیتی امیدوار کے طور پر داخلہ لینے کی درخواست دائر کی تھی۔ دوران سماعت چیف جسٹس نے استفسار کیا کہ آپ پونیا ہیں، آپ کونسی اقلیت ہیں، بتائیں آپ کون سی پونیا ہیں؟ درخواست گزار کے وکیل نے پھر جواب دیا کہ آپ جاٹ پونیا ہیں۔ عدالت نے پھر پوچھا کہ آپ اقلیت کیسے ہو گئے؟ درخواست گزار کے وکیل نے جواب دیا، میں نے بدھ مت اختیار کر لیا ہے اور مجھے ریزرویشن کا حق حاصل ہے۔ عدالت نے پھر ریمارکس دیے کہ یہ تو نئی قسم کا فراڈ ہے۔

سماعت کے دوران عدالت نے ہریانہ حکومت کے چیف سکریٹری کو ہدایت دی کہ وہ اقلیتی سرٹیفکیٹ دینے کے رہنما خطوط سے عدالت کو آگاہ کریں۔ عدالت نے ہریانہ حکومت سے یہ بھی واضح کرنے کو کہا کہ کیا عام زمرہ کا کوئی امیدوار بدھ مت اختیار کرکے اقلیتی سرٹیفکیٹ کے لیے اہل ہو سکتا ہے۔

---------------

ہندوستان سماچار / عبدالسلام صدیقی