نئی دہلی، 25 مارچ (ہ س)۔ سری لنکا کے 19 رکنی پارلیمانی وفد نے اسمارٹ سٹی مشن، شہری خدمات، صفائی کے اقدامات، اور مربوط کمانڈ اینڈ کنٹرول سینٹر جیسے پروجیکٹوں کا جائزہ لینے کے لیے نئی دہلی میونسپل کونسل (این ڈی ایم سی) کا دورہ کیا۔ وفد نے این ڈی ایم سی کے عہدیداروں سے تفصیلی جانکاری حاصل کی اور شہری خدمات سے متعلق مختلف مسائل پر تبادلہ خیال کیا۔
بدھ کے روز ہندوستان کا دورہ کرنے والے سری لنکا کے وفد کی قیادت سری لنکا کی پارلیمنٹ کی رکن اور انفراسٹرکچر اور اسٹریٹجک امور کی نگرانی کمیٹی کی رکن آسیتھا نروشنا ایگوڈا وتھانہ کر رہی تھی۔ اس موقع پر این ڈی ایم سی کے چیئرمین کیشو چندرا نے پائیدار شہری ترقی اور جدید شہری انتظامیہ پر ایک پریزنٹیشن دیا۔ سکریٹری راہل سنگھ نے اسمارٹ سٹی مشن کے تحت کی گئی کوششوں پر ایک مختصر فلم دکھائی، جبکہ پبلک ہیلتھ آفیسر ڈاکٹر شکنتلا سریواستو نے صفائی ستھرائی اور سالڈ ویسٹ مینجمنٹ کے اقدامات کے بارے میں جانکاری دی۔
اس کے علاوہ وفد نے این ڈی ایم سی کے انٹیگریٹڈ کمانڈ اینڈ کنٹرول سینٹر (آئی سی سی سی) کا بھی دورہ کیا جہاں ای گورننس اور ایم گورننس کے نظام کے ذریعے عوامی خدمات کی فراہمی میں تبدیلیوں کا مظاہرہ کیا گیا۔این ڈی ایم سی کے سینئر عہدیداروں بشمول سکریٹری، فنانشل ایڈوائزر، چیف انجینئر، چیف آرکیٹیکٹ، ہیلتھ آفیسر اور مختلف محکموں کے ڈائریکٹرز نے سیکٹر کے لیے مخصوص اقدامات اور اختراعات پر اپنے خیالات کا اظہار کیا۔سری لنکا کے وفد نے این ڈی ایم سی کے بہترین شہری انتظامی ماڈل کی تعریف کی اور سری لنکا کی شہری ترقی کی حکمت عملیوں میں اس طرح کے اقدامات کو اپنانے کے امکانات پر غور کیا۔
ہندوستھان سماچار
ہندوستان سماچار / Md Owais Owais
