رام گوپال ورما نے اپنی مشہور فرنچائز ’سرکار‘ کی چوتھی قسط کے حوالے سے بڑا فیصلہ کیا ہے۔ سرکار 4 کے حالیہ اعلان نے مداحوں میں جوش و خروش پیداکر دیا تھا اور امیتابھ بچن اور ابھیشیک بچن کی واپسی کے بارے میں قیاس آرائیاں شروع ہو گئی تھیں، لیکن ڈائریکٹر نے اب ان منصوبوں کو منسوخ کر دیا ہے۔

میڈیا رپورٹس کے مطابق رام گوپال ورما نے کہا کہ ”دھورندھر“ جیسی فلموں کے بعد گینگسٹر جنر میں نئی فلم لانچ کرنا مشکل ہوگا۔ انہوں نے اعتراف کیا کہ ان کی پچھلی فلمیں دی گاڈ فادر سے متاثر تھیں اور ان کی سوچ بدل گئی ہے۔ انہوں نے خود کو ہدایت کار آدتیہ دھر کا پرستار قرار دیتے ہوئے دھورندھر 2 کی تعریف کی۔

رام گوپال ورما نے واضح کیا ہے کہ وہ اب ’سرکار 4‘ پر کام نہیں کریں گے بلکہ ’سنڈیکیٹ‘ نامی نئی فلم میں کام کریں گے۔ انہوں نے کہا کہ یہ پروجیکٹ ان کے لیے ایک بہت ہی ایماندارانہ کوشش ہوگی اور ستیہ کے بعد سے ان کا سب سے حقیقی کام ثابت ہو سکتا ہے۔ ہدایت کار کے مطابق وہ اپنی تمام تر توانائیاں اس نئی فلم میں لگانا چاہتے ہیں، حالانکہ انہوں نے اس کے نتائج کے بارے میں بے یقینی کا اظہار کیا۔

---------------

ہندوستان سماچار / عبدالسلام صدیقی