ممبئی ، 24 مارچ (ہ س) دھنگر سماج کو ایس ٹی زمرے میں ریزرویشن دینے کے مطالبے پر سماجی رہنما دیپک بھاؤ بورہاڑے نے ممبئی کے آزاد میدان میں غیر معینہ مدت کی بھوک ہڑتال شروع کر رکھی ہے، جو گزشتہ آٹھ دنوں سے جاری ہے۔ 24 مارچ 2026 کو اس احتجاج کے سلسلے میں بیڑ ضلع کے لمباگنیش علاقے سے بڑی تعداد میں دھنگر سماج کے افراد ممبئی کے لیے روانہ ہوئے اور اپنے مطالبات کے حق میں زبردست مظاہرہ کیا۔

اس موقع پر چھترپتی شیواجی مہاراج چوک سے پُنیہ شلوک اہلیہ دیوی ہولکر چوک تک جلوس نکالا گیا، جس میں ڈھول تاشوں کی گونج کے ساتھ مختلف نعرے لگائے گئے۔ مظاہرین نے “یلکوٹ یلکوٹ جے ملہار”، “اہلیہ دیوی ہولکر کی جیت ہو” اور “ریزرویشن ہمارا حق ہے” جیسے نعرے بلند کیے۔

سماج کے نمائندوں نے حکومت سے مطالبہ کیا کہ عدالتوں اور کمیٹیوں کے پیچیدہ عمل میں الجھنے کے بجائے فوری طور پر یہ فیصلہ کیا جائے کہ “دھنگر” اور “دھنگڑ” ایک ہی برادری ہیں، تاکہ ریزرویشن کا راستہ صاف ہو سکے۔ انہوں نے مزید کہا کہ ریاستی گورنر کی منظوری کے ساتھ سفارش صدر جمہوریہ کو بھیجی جائے تاکہ آئینی عمل مکمل کیا جا سکے اور سماج کو اس کا حق مل سکے۔

مظاہرین نے دیپک بھاؤ بورہاڑے کی صحت پر بھی تشویش ظاہر کرتے ہوئے حکومت سے اپیل کی کہ ان کی بھوک ہڑتال جلد ختم کرائی جائے اور ان کی جان بچائی جائے۔

اس احتجاج میں راجے بھاؤ اپا گِرے، بالاصاحب مولے، گنپت تاگڑ، رام کسن گِرے، شہادیو دھلپے، سندیپ مولے، رام داس مولے، بنکٹ وشومبر مولے، پروین مولے اور پرکاش مولے سمیت کئی افراد شریک ہوئے۔

اس کے علاوہ مختلف برادریوں کے افراد نے بھی بڑی تعداد میں شرکت کر کے اپنی حمایت کا اظہار کیا، جبکہ ڈاکٹر گنیش دھولے، بالاصاحب جادھو، بالکرشن تھورات، ہری اوم کشیرساگر، شیواجی رنکھمب، توکارام گائیکواڑ اور ارون نرمل بھی اس موقع پر موجود تھے۔

ہندوستھان سماچار

ہندوستان سماچار / جاوید این اے