سانبہ میں سابق سرپنچ کے گھر پر حملے کے معاملے میں این آئی اے نے جائے وقوعہ کا جائزہ لیا

جموں، 24 مارچ (ہ س)۔ ضلع سانبہ کے گھگوال سیکٹر میں پیر کی علی الصبح ایک سابق سرپنچ کے گھر کے باہر پراسرار دھماکہ پیش آیا، جس سے علاقے میں خوف و ہراس پھیل گیا۔ حکام کے مطابق یہ دھماکہ گوالہ تالاب علاقے میں جئے رام شرما کے مکان کے باہر پیش آیا، جو بین الاقوامی سرحد سے تقریباً 10 کلومیٹر کے فاصلے پر واقع ہے۔ دھماکے کی وجہ فوری طور پر معلوم نہیں ہو سکی۔

دھماکے کے نتیجے میں مکان کا گیٹ اور باؤنڈری وال کا ایک حصہ تباہ ہو گیا، جبکہ آس پاس کے گھروں کی کھڑکیوں کے شیشے بھی ٹوٹ گئے۔ تاہم کسی جانی نقصان کی اطلاع نہیں ملی ہے۔ واقعے کے بعد فارنسک ماہرین نے جائے وقوعہ سے نمونے جمع کیے تاکہ دھماکے کی نوعیت کا پتہ لگایا جا سکے۔ اس کے علاوہ نیشنل انویسٹی گیشن ایجنسی (این آئی اے) اور نیشنل سیکورٹی گارڈ (این ایس جی) کی ٹیمیں بھی سنفر ڈاگز کے ہمراہ موقع پر پہنچیں اور تحقیقات شروع کیں۔

سینئر سپرنٹنڈنٹ آف پولیس سانبہ، وریندر سنگھ منہاس نے بتایا کہ دھماکہ رات تقریباً 1 بج کر 7 منٹ پر ہوا، جب گھر کے مکینوں نے زور دار آواز سنی اور باہر نکل کر نقصان کا جائزہ لیا۔ سابق سرپنچ جئے رام شرما نے بتایا کہ اس طرح کا زوردار دھماکہ پہلے کبھی نہیں سنا گیا اور اس سے پورا گاؤں لرز اٹھا۔ انہوں نے واقعے کی مکمل تحقیقات کا مطالبہ کیا ہے۔ پولیس نے اس سلسلے میں مقدمہ درج کر کے مزید تحقیقات شروع کر دی ہے۔

ہندوستھان سماچار

--------------

ہندوستان سماچار / محمد اصغر