لاتور ، 24 مارچ (ہ س)۔ لاتور ضلع پولیس نے خود کو پولیس افسر ظاہر کر کے شہریوں کو دھوکہ دینے والے ایک عادی ملزم کو گرفتار کر لیا ہے۔ مقامی کرائم برانچ کی اس کارروائی میں ملزم کے قبضے سے 4 لاکھ 30 ہزار روپے نقد ضبط کیے گئے ہیں، جبکہ دیگر اضلاع میں اس سے جڑے جرائم کی بھی تفتیش شروع کر دی گئی ہے۔

حالیہ دنوں میں ضلع میں دھوکہ دہی کے کئی واقعات سامنے آنے کے بعد پولیس سپرنٹنڈنٹ امول تامبے نے ایسے جرائم کا پردہ فاش کرنے کے لیے خصوصی مہم چلانے کی ہدایت دی تھی، جس کے تحت ایڈیشنل سپرنٹنڈنٹ منگیش چوہان کی نگرانی میں مقامی کرائم برانچ سرگرم تھی۔

اسی دوران پولیس ٹیم کو خفیہ اطلاع ملی کہ ریناپور ناکہ علاقے میں ایک شخص خود کو پولیس افسر ظاہر کر کے شہریوں کو دھوکہ دے رہا ہے، جس پر فوری کارروائی کرتے ہوئے جال بچھا کر ملزم کو حراست میں لیا گیا۔

گرفتار ملزم کی شناخت وجے انیرُدھ قدم (عمر 25 سال) ساکن پربھنی کے طور پر ہوئی ہے۔ تلاشی کے دوران اس کے پاس سے 4 لاکھ 30 ہزار روپے نقد برآمد ہوئے، جو ضبط کر لیے گئے۔

ابتدائی تفتیش میں ملزم نے انکشاف کیا کہ وہ اخبارات میں شائع ہونے والی چوری کی خبروں سے متاثرہ افراد کے نمبر حاصل کرتا تھا اور خود کو پولیس افسر بتا کر ان سے رابطہ کرتا تھا۔ وہ یو پی ایس سی انٹرویو کا ویڈیو دکھا کر اپنی شناخت کا یقین دلاتا اور جعلی پنچنامہ تیار کر کے لوگوں سے دستخط کروا لیتا تھا۔

ملزم شہریوں کو چوری شدہ سامان واپس دلانے کا لالچ دے کر ان سے بڑی رقم وصول کرتا تھا۔ احمدپور کے ایک متاثرہ شخص سے اس نے اسی طریقے سے 5 لاکھ روپے حاصل کیے تھے، جن میں سے 70 ہزار خرچ کر چکا تھا جبکہ باقی 4 لاکھ 30 ہزار روپے پولیس نے ضبط کر لیے۔

ملزم نے اعتراف کیا ہے کہ وہ گزشتہ دو برسوں سے ناندیڑ اور پربھنی اضلاع میں اسی طرز پر دھوکہ دہی کر رہا تھا۔ اس معاملے میں احمدپور پولیس اسٹیشن میں مختلف دفعات کے تحت مقدمہ درج کیا گیا ہے اور مزید تفتیش جاری ہے۔

یہ کارروائی پولیس سپرنٹنڈنٹ امول تامبے اور ایڈیشنل سپرنٹنڈنٹ منگیش چوہان کی رہنمائی میں کرائم برانچ کے انسپکٹر سدھاکر باوکر کی قیادت میں انجام دی گئی، جس میں پی ایس آئی پرمود دیشمکھ سمیت متعدد اہلکار شامل تھے۔

پولیس نے عوام سے اپیل کی ہے کہ اگر کوئی شخص خود کو پولیس افسر ظاہر کر کے رقم طلب کرے تو فوراً ہوشیار ہو جائیں اور ایسی کسی بھی مشتبہ سرگرمی کی اطلاع قریبی پولیس اسٹیشن یا کنٹرول روم کو دیں۔

ہندوستھان سماچار

--------------------

ہندوستان سماچار / جاوید این اے