ممبئی ، 21 مارچ (ہ س)۔ شیو سینا (یو بی ٹی) کے سربراہ اور سابق وزیر اعلیٰ ادھو ٹھاکرے نے کہا ہے کہ ناسک کے مبینہ عصمت دری معاملے کی ہر زاویے سے مکمل اور غیر جانبدارانہ تحقیقات کی جانی چاہیے تاکہ حقیقت عوام کے سامنے آ سکے۔

انہوں نے 21 مارچ 2026 کو ممبئی میں صحافیوں سے گفتگو کرتے ہوئے کہا کہ اس معاملے میں پولیس نے ملزم اشوک کھرات کو گرفتار کیا ہے اور کئی سیاسی رہنماؤں کے نام بھی سامنے آ رہے ہیں۔ ان کے مطابق سیاست کا معیار اس حد تک گر چکا ہے کہ رہنما ایسے ملزمان باباؤں کے پاس جانے لگے ہیں۔

ادھو ٹھاکرے نے کہا کہ ریاست میں جادو ٹونا مخالف قانون موجود ہے، لیکن اگر قانون نافذ کرنے والے ہی ایسے افراد کے پیروکار بن جائیں تو ان کے خلاف بھی کارروائی ہونی چاہیے۔ انہوں نے زور دیا کہ مہاراشٹر کو آگے لے جانے کے لیے اس معاملے کو سنجیدگی سے لینا ضروری ہے۔ انہوں نے کہا کہ اس کیس کی مکمل اور غیر جانبدارانہ تحقیقات ہونی چاہیے تاکہ عوام کو حقیقت معلوم ہو سکے کہ جن نمائندوں کو انہوں نے منتخب کیا ہے، ان کی اصل صورتحال کیا ہے۔

صحافیوں کے سوال پر، جس میں پوچھا گیا کہ ان کے دور حکومت میں ملزم کے ادارے کو پانی فراہم کیا گیا تھا، ادھو ٹھاکرے نے کہا کہ انہوں نے ہر زاویے سے تحقیقات کا مطالبہ کیا ہے اور اس میں یہ پہلو بھی شامل ہے، جس کا جواب تفتیش کے دوران سامنے آ جائے گا۔ انہوں نے مزید کہا کہ اس موقع پر ہر گاؤں میں ایسے عناصر کے خلاف کارروائی ہونی چاہیے، چاہے ان کا تعلق کسی بھی سیاسی جماعت سے ہو۔

ادھو ٹھاکرے نے اس کے ساتھ مراٹھی نوجوانوں کے لیے ایکسپورٹ امپورٹ لاجسٹکس کورس شروع کرنے کا اعلان بھی کیا۔ انہوں نے بتایا کہ 23 جنوری سے بالاساہب ٹھاکرے کی پیدائش کا صد سالہ سال شروع ہوا ہے، اور اسی کے تحت یہ قدم اٹھایا گیا ہے تاکہ مراٹھی نوجوانوں کو خود کفیل بنایا جا سکے۔ انہوں نے کہا کہ صرف مراٹھی کے نام پر تحریک چلانے کے بجائے عملی اقدامات ضروری ہیں، اسی لیے شیو سینا (یو بی ٹی) کی جانب سے یہ کورس شروع کیا گیا ہے، جس سے نوجوانوں کو فائدہ ہوگا۔

ہندوستھان سماچار

--------------------

ہندوستان سماچار / جاوید این اے