ممبئی ، 20 مارچ (ہ س) مہاراشٹر کے وزیر اعلیٰ دیویندر فڑنویس نے پیش کردہ بجٹ کے ذریعے ریاست کی مجموعی ترقی کو تیز کرنے کا عزم ظاہر کیا ہے اور 2027 تک مہاراشٹر کی معیشت کو 5 ٹریلین ڈالر تک پہنچانے کا ہدف مقرر کیا ہے۔ یہ بات ریاست کے جنگلات کے وزیر گنیش نائک نے جمعہ، 20 مارچ کو تھانے میں بی جے پی دفتر میں منعقدہ پریس کانفرنس میں کہی۔
گنیش نائک نے کہا کہ اس بجٹ میں انفراسٹرکچر کو خاص اہمیت دی گئی ہے، جس کے تحت تھانے میں گائے مکھ اور فاؤنٹین کے درمیان سب وے تعمیر کیا جائے گا۔ اسی طرح پین علاقے میں “تیسری ممبئی” کے نام سے ایک بڑا ترقیاتی منصوبہ شروع کیا جائے گا، جس سے تقریباً 12 لاکھ روزگار کے مواقع پیدا ہونے کی توقع ہے۔
انہوں نے بتایا کہ توانائی کے شعبے میں ہر ضلع میں ایم ایس ای بی سینٹر قائم کیے جائیں گے، جس سے تقریباً 50 لاکھ افراد کو روزگار ملنے کے امکانات ہیں۔ ماحولیاتی تحفظ کے لیے 300 کروڑ درخت لگانے کا ہدف رکھا گیا ہے اور وزیر اعظم نریندر مودی کے “ایک پیڑ ماں کے نام” مہم کو بھی فروغ دیا جائے گا۔
گنیش نائک کے مطابق ودربھ، کونکن اور مغربی مہاراشٹر میں جنگلاتی آگ پر قابو پانے کے لیے ہر خطے میں ایک ایک ہیلی کاپٹر فراہم کیا جائے گا، جبکہ پالگھر میں ایشیا کی دس بڑی بندرگاہوں میں شامل ایک نئے پورٹ کی تعمیر کا منصوبہ بھی زیر عمل ہے۔
انہوں نے کہا کہ یہ بجٹ کسانوں کے لیے بھی مددگار ثابت ہوگا۔ گزشتہ سال شدید بارش سے متاثر کسانوں کے لیے 2 لاکھ روپے تک کے قرض معاف کیے گئے ہیں، جبکہ باقاعدگی سے قرض ادا کرنے والے کسانوں کو 50,000 روپے کی ترغیبی امداد دی جائے گی۔ ایگری اسٹیک، مہاویدھ، کراپ سیپ اور مہا ڈی بی ٹی جیسے ڈیجیٹل پلیٹ فارمز کے ذریعے زرعی شعبے کو مضبوط بنانے پر بھی زور دیا گیا ہے۔
“وزیر اعلیٰ بلی راجہ مفت بجلی اسکیم” کو جاری رکھا جائے گا، جس کے لیے تقریباً 20,000 کروڑ روپے مختص کیے گئے ہیں، جبکہ “وزیر اعلیٰ سوریا کرشی واہنی یوجنا 2.0” کے تحت 16,000 میگاواٹ توانائی پیدا کی جائے گی اور زرعی پمپوں کو دن کے وقت بجلی فراہم کی جائے گی۔
ریاست میں پانی کے وسائل کو مستحکم کرنے کے لیے مختلف ندی جوڑ منصوبوں پر کام کیا جائے گا، جن میں وین گنگا-نل گنگا، دمن گنگا-ویترنا-گوداوری، نار-پار-گرنا اور دمن گنگا-ایکدارے-گوداوری شامل ہیں، جن کے لیے ہزاروں کروڑ روپے مختص کیے گئے ہیں۔ کولہاپور اور سانگلی اضلاع میں سیلاب سے بچاؤ کے لیے ورلڈ بینک کے تعاون سے منصوبے نافذ کیے جائیں گے۔
ٹرانسپورٹ کے شعبے میں میٹرو نیٹ ورک کو 1,200 کلومیٹر تک بڑھانے کا فیصلہ کیا گیا ہے، جس میں ممبئی سے نوی ممبئی انٹرنیشنل ایئرپورٹ (این ایم آئی اے) تک میٹرو، وڈالا سے گیٹ وے آف انڈیا میٹرو-11 اور پونے میٹرو کے دوسرے مرحلے کو منظوری دی گئی ہے۔
اس کے علاوہ مختلف ایکسپریس ویز، ایلیویٹڈ روڈز اور گرین فیلڈ ہائی ویز کے ذریعے آمدورفت کو تیز اور آسان بنایا جائے گا۔ “مہاراشٹر امرت کال روڈ ڈیولپمنٹ اسکیم” کے تحت ہزاروں کلومیٹر طویل سڑکوں کا جال بچھایا جائے گا اور دیہی علاقوں میں رابطہ نظام کو مضبوط کیا جائے گا۔
ہندوستھان سماچار
--------------------
ہندوستان سماچار / جاوید این اے
