ممبئی ، 02 مارچ (ہ س) بی جے پی نے شیو سینا (ادھو ٹھاکرے) کے رہنما سنجے راؤت کے اس مطالبے پر سخت ردعمل ظاہر کیا ہے جس میں انہوں نے خلیجی ممالک میں جاری تنازع کے تناظر میں وزیراعظم نریندر مودی سے ملک کی صورتحال واضح کرنے کو کہا تھا۔ پارٹی کے ریاستی صدر نوناتھ بان نے کہا کہ وزیراعظم کو اس نوعیت کا مشورہ دینا نہ صرف غیر ضروری بلکہ مضحکہ خیز ہے کیونکہ مرکزی قیادت پہلے ہی خارجہ پالیسی کے معاملے میں پوری طرح متحرک ہے۔

ریاستی پارٹی دفتر میں منعقدہ پریس کانفرنس میں نوناتھ بان نے کہا کہ وزیراعظم موجودہ حالات پر گہری نظر رکھے ہوئے ہیں اور ملک کے مفادات کے مطابق فیصلے کر رہے ہیں۔ ان کا کہنا تھا کہ 140 کروڑ عوام کو ان کی قیادت پر بھروسہ ہے اور بیرون ملک ہندوستانیوں کی سلامتی یقینی بنانے کی صلاحیت بھی حکومت میں موجود ہے۔

انہوں نے سنجے راؤت کو تنقید کا نشانہ بناتے ہوئے کہا کہ ایسے وقت میں قومی سطح کے معاملات پر بیان دینے کے بجائے انہیں اپنی جماعت اور مہاوکاس اگھاڑی کے اندر پائے جانے والے انتشار کو سنبھالنے پر توجہ دینی چاہیے۔ ان کے مطابق اتحاد کے اندرونی مسائل زیادہ اہم ہیں جنہیں نظرانداز نہیں کیا جا سکتا۔

بی جے پی لیڈر نے کہا کہ خلیجی خطے کی صورتحال حساس ضرور ہے مگر حکومت مکمل طور پر چوکس ہے اور تمام فیصلے حالات کے مطابق کیے جا رہے ہیں۔ انہوں نے راؤت کے بیان کو محض سیاسی بیان بازی قرار دیتے ہوئے کہا کہ اس سے غیر ضروری ابہام پیدا کیا جا رہا ہے۔

یہ بات قابل ذکر ہے کہ سنجے راؤت نے صبح کی پریس کانفرنس میں خلیجی ممالک میں جاری تنازع کے باعث ملک میں تشویش کا ماحول ہونے کا ذکر کیا تھا اور وزیراعظم سے اس معاملے پر وضاحت دینے کا مطالبہ کیا تھا، جس کے جواب میں بی جے پی کی جانب سے یہ ردعمل سامنے آیا۔

ہندوستھان سماچار

--------------------

ہندوستان سماچار / جاوید این اے