نئی دہلی، 02 مارچ (ہ س)۔ مرکزی وزیر تعلیم دھرمیندر پردھان نے غیر ملکی اعلیٰ تعلیمی اداروں (ایچ ای آئی) سے ہندوستان کے تیزی سے بڑھتے ہوئے، اختراع پر مبنی اور کثیر الضابطہ تعلیمی نظام کے ساتھ تعاون بڑھانے کی اپیل کی ہے۔

پیر کے روز یہاں سشما سوراج بھون میں وزارت تعلیم کے زیر اہتمام 'اسٹڈی ان انڈیا' ایڈو ڈپلومیٹک کنکلیو 2026 سے خطاب کرتے ہوئے پردھان نے کہا کہ ہندوستان کا تعلیمی نظام ایک بڑی تبدیلی سے گزر رہا ہے اور عالمی شراکت کے لیے تیار ہے۔ کانفرنس میں 50 سے زائد ممالک کے سفیروں، ہائی کمشنرز اور سفارتی مشنز کے نمائندوں نے شرکت کی۔

انہوں نے کہا کہ قومی تعلیمی پالیسی 2020 کے تحت انٹرنیشنلائزیشن، معیار، اختراع اور سستی تعلیم پر خصوصی زور دیا گیا ہے۔ انہوں نے کہا کہ وزیر اعظم نریندر مودی نے سال 2047 تک ہندوستان کو ایک ترقی یافتہ ملک بنانے کا ہدف مقرر کیا ہے اور اس مقصد کو حاصل کرنے کے لیے تعلیم ایک اہم ستون ہے۔

پردھان نے کہا کہ ہندوستان کی سب سے بڑی طاقت اس کا مضبوط علمی ماحولیاتی نظام، نوجوان آبادی اور تیزی سے بڑھتی ہوئی معیشت ہیں۔ اسٹڈی ان انڈیا پہل عالمی طلباء اور محققین کے لیے نئے مواقع پیدا کر رہی ہے۔ انہوں نے کہا کہ ہندوستان گلوبل ساو¿تھ ماڈل کو آگے بڑھاتے ہوئے مصنوعی ذہانت، بایو ٹکنالوجی، سیمی کنڈکٹرز، اور پائیدار توانائی جیسے شعبوں میں ایک قابل اعتماد اختراعی پارٹنر کے طور پر ابھر رہا ہے۔

اس موقع پر خطاب کرتے ہوئے ہائر ایجوکیشن کے سکریٹری ڈاکٹر ونیت جوشی نے کہا کہ گزشتہ چھ سالوں میں قومی تعلیمی پالیسی 2020 نے اعلیٰ تعلیمی اصلاحات کے لیے واضح سمت فراہم کی ہے۔ یونیورسٹی گرانٹس کمیشن نے غیر ملکی یونیورسٹیوں کے لیے ہندوستان میں کیمپس قائم کرنے کے لیے ایک شفاف اور وقت کے پابند ریگولیٹری فریم ورک کو لاگو کیا ہے۔

کانفرنس میں ہندوستانی علمی روایت، ایس پی اے آر سی اور زیان کے ذریعے تعلیمی شراکت، مصنوعی ذہانت اور جدید ٹیکنالوجی، غیر ملکی یونیورسٹی کیمپس کے لیے یو جی سی کے ضوابط 2023، بین الاقوامی ہنر کا فریم ورک اور 'انڈیا انوویٹ 2026' جیسے موضوعات پر غور کیا گیا۔

کنکلیو نے طلباء کی نقل و حرکت، مشترکہ پروگرام، تحقیقی تعاون اور بین الاقوامی کیمپس کے قیام جیسے شعبوں میں ٹھوس تعاون کے مواقع پیش کئے۔

---------------

ہندوستان سماچار / عبدالسلام صدیقی