جموں، 02 مارچ (ہ س)۔ منشیات کے خلاف جاری مہم کے تحت جموں پولیس ساؤتھ زون نے بڑی کامیابی حاصل کرتے ہوئے گاندھی نگر تھانہ حدود میں تقریباً 21 گرام ہیروئن نما نشہ آور مادہ برآمد کرکے دو مبینہ منشیات فروشوں کو گرفتار کر لیا۔

پولیس کے مطابق گاندھی نگر پولیس اسٹیشن کی ایک ٹیم معمول کی گشت پر تھی، اس دوران والمیکی کالونی کے علاقے میں مشتبہ افراد کو حراست میں لیا۔گرفتار شدگان کی شناخت وشال کمار ولد دلیپ کمار ساکن گندو چھاؤنی جموں اور روہت سنگھ ولد درشن لال ساکن نانک نگر جموں کے طور پر کی گئی ہے۔

پولیس کے مطابق وشال کمار کی ذاتی تلاشی کے دوران تقریباً 11 گرام ہیروئن ایک ڈیجیٹل وزنی مشین اور 7 ہزار 200 روپے نقد برآمد ہوئے، جبکہ روہت سنگھ کے قبضے سے تقریباً 10 گرام ہیروئن نما مادہ اور ایک تیز دھار ہتھیار (ٹوکا) برآمد کیا گیا۔ اس سلسلے میں تھانہ گاندھی نگر میں ایف آئی آر نمبر 52/2026 درج کر لی گئی ہے اور ملزمان کے خلاف این ڈی پی ایس ایکٹ کی متعلقہ دفعات، آرمز ایکٹ اور بی این ایس کے تحت مقدمہ قائم کیا گیا ہے۔

پولیس نے بتایا کہ معاملے کی مزید تفتیش جاری ہے تاکہ اس نیٹ ورک کے آگے اور پیچھے کے روابط کا پتہ چلایا جا سکے۔

جموں پولیس ساؤتھ زون نے منشیات کے خاتمے کے اپنے عزم کو دہراتے ہوئے عوام سے اپیل کی ہے کہ منشیات فروشی سے متعلق کسی بھی اطلاع کو پولیس کے ساتھ شیئر کریں تاکہ معاشرے کو اس لعنت سے پاک کیا جا سکے۔

ہندوستھان سماچار

---------------

ہندوستان سماچار / محمد اصغر