سیکیورٹی گارڈ اور اس کے تین دوست گرفتاراورنگ آباد ، 02 مارچ (ہ س)۔ اورنگ آباد کی صنعتی بستی والوج کے ہمّال واڑا علاقے میں ایک پائپ کمپنی کے احاطے میں پیش آنے والے واقعے نے سنسنی پھیلا دی، جہاں ایک نامعلوم شخص کو مبینہ طور پر وائر چور سمجھ کر اتنا پیٹا گیا کہ اس کی موت واقع ہو گئی۔ پولیس نے سیکیورٹی گارڈ اور اس کے تین دوستوں کو قتل کے الزام میں گرفتار کر لیا ہے۔پولیس کے مطابق 18 فروری کی رات کمپنی کے احاطے میں ایک لاش ملی تھی۔ ابتدائی طور پر اسے مشتبہ موت سمجھا گیا اور پنچنامہ کر کے لاش کو گھاٹی اسپتال بھیج دیا گیا۔ تاہم پوسٹ مارٹم رپورٹ میں جسم پر کئی مقامات پر سوجن اور شدید چوٹوں کے آثار ملنے کے بعد واضح ہوا کہ کسی کند شے سے وار کیا گیا تھا، جس کے بعد معاملہ قتل کا ثابت ہوا۔تفتیش میں معلوم ہوا کہ سیکیورٹی گارڈ راہل بابوراؤ دُتونڈے (24) ڈیوٹی پر موجود تھا اور اس کے تین دوست رشیکیش ببن وقتے (25)، روہت سنتوش نگرالے (19) اور چندرکانت بھاؤصاحب مارکل (21، ساکن کھنڈوبا مندر، ستارا گاؤں) کمپنی میں آئے تھے۔ چاروں نے احاطے میں ہی شراب نوشی کی۔ اسی دوران ایک شخص کے اندر آنے پر شبہ ہوا کہ وہ وائر چوری کے ارادے سے داخل ہوا ہے۔نشے کی حالت میں ملزمان نے اسے پکڑ کر رسی سے کرسی کے ساتھ باندھا اور بری طرح مارا پیٹا۔ شدید زخموں کے باعث اس کی وہیں موت ہو گئی۔ موت کا علم ہوتے ہی چاروں موقع سے فرار ہو گئے۔ بعد ازاں پولیس نے جائے وقوعہ پر موجود سیکیورٹی گارڈ سے پوچھ گچھ کی تو اس کے بیانات میں تضاد پایا گیا۔ خفیہ اطلاع اور تکنیکی شواہد کی بنیاد پر چاروں کو حراست میں لیا گیا، جہاں انہوں نے شبہے کی بنیاد پر تشدد کرنے کا اعتراف کیا۔اتوار کو ملزمان کو عدالت میں پیش کیا گیا۔ اسسٹنٹ پبلک پراسیکیوٹر سدیش دلوئی نے عدالت کو بتایا کہ جرم کا مقصد جانچنا، ممکنہ دیگر ساتھیوں کا پتہ لگانا اور استعمال شدہ ہتھیار برآمد کرنا ضروری ہے، اس لیے پولیس تحویل دی جائے۔ فرسٹ کلاس جوڈیشل مجسٹریٹ سنیہل جادھو نے چاروں کو تین دن کی پولیس حراست میں بھیجنے کا حکم دیا ہے۔ پولیس کی تفتیش جاری ہے اور متوفی کی شناخت معلوم کرنے کی کوشش کی جا رہی ہے۔ہندوستھان سماچار

--------------------

ہندوستان سماچار / جاوید این اے