ناگپور صنعتی دھماکہ لاپرواہی کا شاخسانہ : وزیرِ محصولات کا بیانممبئی، 02 مارچ (ہ س)۔ ناگپور کے راولگاؤں میں واقع بی ایس ایل انرجی لمیٹڈ میں پیش آئے ہولناک دھماکے کے سلسلے میں ریاستی وزیرِ محصولات اور ضلع کے سرپرست وزیر چندرشیکھر باونکولے نے کہا ہے کہ ابتدائی تفتیش سے واضح ہوا ہے کہ حادثہ لاپرواہی کے باعث پیش آیا۔ اتوار کو ہونے والے اس سانحے میں 19 افراد ہلاک اور 23 زخمی ہوئے جن میں سے 13 کی حالت نازک بتائی گئی ہے۔ واقعہ کے بعد طلب کی گئی اعلیٰ سطحی میٹنگ میں ریاستی وزیر آشیش جیسوال، رکن پارلیمنٹ شیام کمار بروے، رکن اسمبلی شرد سنگھ ٹھاکر سمیت اعلیٰ انتظامی اور پولیس افسران نے شرکت کی۔صحافیوں سے بات کرتے ہوئے انہوں نے بتایا کہ دھماکہ خیز مواد تیار کرنے والی اس فیکٹری کے معاملے میں کلمیشور پولیس نے بھارتیہ نیائے سہنتا کی دفعہ 105 کے تحت کمپنی کے 21 ڈائریکٹرس اور شیئر ہولڈرس کے خلاف مقدمہ درج کیا ہے اور 9 افراد کو حراست میں لیا جا چکا ہے۔ انہوں نے کہا کہ تفتیش کا دائرہ مزید وسیع کیا جا رہا ہے۔متاثرین کے لیے امدادی پیکیج کا اعلان کرتے ہوئے وزیرِ محصولات نے بتایا کہ کمپنی مہلوکین کے خاندانوں کو 75 لاکھ روپے جبکہ زخمیوں کو 25 لاکھ روپے ادا کرے گی۔ مرکزی حکومت کی جانب سے 2 لاکھ اور ریاستی حکومت کی طرف سے 5 لاکھ روپے اضافی دیے جائیں گے، جس کے بعد ہر مہلوک کے لواحقین کو مجموعی طور پر 82 لاکھ روپے کی مالی مدد حاصل ہوگی۔ دائمی معذوری کا شکار ہونے والوں کے لیے خصوصی بحالی اسکیم نافذ کی جائے گی۔انہوں نے کہا کہ ماضی میں حفاظتی معائنہ اور معیار کے نفاذ میں جہاں بھی کوتاہی ہوئی ہے اس کی ذمہ داری طے کی جائے گی اور ضرورت پڑنے پر سیفٹی ایجنسیوں کے افسران کے خلاف کارروائی ہوگی۔ اس کے علاوہ ناگپور میں گزشتہ برسوں کے دوران دھماکہ خیز فیکٹریوں میں پیش آئے متعدد حادثات کی رپورٹ تیار کر کے مرکز کو بھیجی جائے گی تاکہ قوانین میں مناسب تبدیلیاں اور سخت معیاری عملی طریقہ کار وضع کیا جا سکے۔باونکولے کے مطابق فیکٹری دوبارہ شروع ہونے تک انتظامیہ ملازمین کو تنخواہ دیتی رہے گی، غیر ہنرمند مزدوروں کو مہارت کی تربیت دی جائے گی اور آئندہ صرف مستند کارکنوں کو ہی کام کی اجازت ہوگی۔ انہوں نے ناگپور ضلع کے تمام صنعتی یونٹس میں حفاظتی معیار کی ہمہ گیر جانچ کا بھی اعلان کیا تاکہ مستقبل میں ایسے سانحات کو روکا جا سکے۔ہندوستھان سماچار

--------------------

ہندوستان سماچار / جاوید این اے