شملہ، 17 مارچ (ہ س)۔ ہماچل پردیش میں موسم بدستور سخت ہے اور سردی نے مارچ کے مہینے میں دسمبر جیسا احساس کرا دیا ہے۔ ریاست کے اونچائی والے علاقوں میں کل رات تازہ برف باری ہوئی، جبکہ منگل کو موسم خراب رہا۔ شملہ اور منالی سمیت بیشتر پہاڑی علاقوں میں صبح سے ہی بادل چھائے ہوئے ہیں اور ٹھنڈی ہواو¿ں نے لوگوں کو گرم لباس پہننے پر مجبور کر دیا ہے۔

اس دوران، لاہول اسپیتی انتظامیہ نے صورتحال کے پیش نظر ایک بڑا فیصلہ لیا ہے۔ ضلع ڈیزاسٹر منیجمنٹ اتھارٹی (ڈی ڈی ایم اے ) کے جاری کردہ حکم کے مطابق، کیلانگ سے اٹل ٹنل تک گاڑیوں کی آمدورفت شدید برف باری، سڑک پر برف جمنے اور خراب نمائش کی وجہ سے معطل کردی گئی ہے۔ انتظامیہ نے واضح طور پر کہا ہے کہ اس راستے پر سفر کرنا فی الحال پرخطر ہے اور جان و مال کو خطرہ لاحق ہو سکتا ہے۔

حکم نامے میں یہ بھی کہا گیا ہے کہ سیسو کے قریب بیریئر لگا کر گاڑیوں کی نقل و حرکت کو روکا جائے گا۔ صرف ہنگامی خدمات جیسے ایمبولینس، پولیس، فائر بریگیڈ اور بارڈر روڈ ٹرانسپورٹ کارپوریشن (بی آر او) کو محدود بنیادوں پر سفر کرنے کی اجازت ہوگی۔ اس کے علاوہ، مقامی باشندوں کے لیے صرف 4x4 گاڑیوں کی اجازت ہے۔ انتظامیہ نے پھنسے ہوئے گاڑیوں کو ترجیحی طور پر نکالنے کا حکم دیا ہے اور برف ہٹانے میں تیزی لانے کے لیے صبح کے اوقات میں سڑک کو مکمل طور پر صاف رکھنے کا فیصلہ کیا ہے۔

محکمہ موسمیات کے مطابق ریاست کے کئی اضلاع میں موسم مزید خراب ہونے کا امکان ہے۔ چمبا، کانگڑا، کلو اور منڈی اضلاع کے لیے آج 40 کلومیٹر فی گھنٹہ کی رفتار سے ہوائیں چلنے اور بجلی گرنے کے ساتھ ایلو الرٹ جاری کیا گیا ہے۔ آئندہ دو روز میں موسم مزید شدید ہونے کا خدشہ ہے۔

18 اور 19 مارچ کو لاہول اسپیتی اور کنور کو چھوڑ کر ریاست کے باقی 10 اضلاع میں موسلا دھار بارش، 50 کلومیٹر فی گھنٹہ کی رفتار سے آندھی-طوفان اور آسمانی بجلی گرنے کی وارننگ جاری کی گئی ہے۔ موسم کا سب سے زیادہ اثر 19 مارچ کو دیکھا جا سکتا ہے۔ اس دن چمبا، کانگڑا، کلّو، منڈی، شملہ اور سولن اضلاع میں اورنج الرٹ جاری کیا گیا ہے، جہاں 60 کلومیٹر فی گھنٹہ کی رفتار سے تیز ہوائیں چلنے اور ژالہ باری کا امکان ہے۔ جبکہ ہمیر پور، بلاس پور، اونا اور سرمور اضلاع کے لیے ایلو الرٹ رہے گا۔ 20 مارچ کو 10 اضلاع میں ایلو الرٹ بھی جاری کیا گیا ہے۔

ریاست میں گزشتہ تین دنوں سے مسلسل بدلتے موسم کا سامنا ہے، پہاڑوں پر برف باری اور زیریں علاقوں میں بارش ہوئی ہے، جس کے نتیجے میں درجہ حرارت میں کمی واقع ہوئی ہے۔ مارچ کے وسط میں سردیوں کی دوبارہ آمد ہوئی ہے۔ موسم کی اس تبدیلی نے عام زندگی خاص طور پر سیاحتی مقامات اور پہاڑی علاقوں کے سفر کو متاثر کیا ہے۔

ہندوستھان سماچار

ہندوستان سماچار / محمد شہزاد