تہران، 15 مارچ (ہ س)۔ ایران کے وزیر خارجہ عباس عراقچی نے خلیج اور مشرقِ وسطیٰ کے ممالک سے اپیل کی ہے کہ وہ اپنے علاقوں سے امریکہ کی فوج کو ہٹانے پر غور کریں۔ ان کا کہنا ہے کہ موجودہ حالات میں غیر ملکی فوج کی موجودگی علاقائی تناو کو مزید بڑھا رہی ہے۔

عراقچی نے کہا کہ پورے خطے میں مسلسل جوابی حملے اور فوجی سرگرمیاں جاری ہیں، جس سے حالات مزید غیر مستحکم ہو گئے ہیں۔ ان کے مطابق، ایسی صورتحال میں بیرونی طاقتوں کی فوجی موجودگی امن قائم کرنے کے بجائے بحران کو مزید گہرا کر سکتی ہے۔

ایرانی وزیر خارجہ نے یہ بھی کہا کہ امریکہ طویل عرصے سے خلیجی ممالک کو سیکورٹی فراہم کرنے کا دعویٰ کرتا رہا ہے، لیکن موجودہ حالات میں یہ سیکورٹی ڈھانچہ کمزور ثابت ہوا ہے۔ انہوں نے الزام لگایا کہ امریکی سیکورٹی پالیسی خطے میں استحکام لانے میں موثر نہیں رہی ہے۔

عراقچی نے یہ دعویٰ بھی کیا کہ امریکہ اب اہم سمندری راستے آبنائے ہرمز کی سیکورٹی یقینی بنانے کے لیے دیگر ممالک، خاص طور پر چین سے تعاون کا مطالبہ کر رہا ہے۔ انہوں نے کہا کہ یہ صورتحال ظاہر کرتی ہے کہ علاقائی سیکورٹی کے نظام میں نئے چیلنجز سامنے آ رہے ہیں۔

ایران نے اپنے پڑوسی ممالک سے اپیل کرتے ہوئے کہا کہ وہ غیر ملکی فوجی طاقتوں کو اپنے علاقوں سے ہٹانے کے بارے میں سنجیدگی سے غور کریں، تاکہ خطے میں استحکام اور امن قائم کیا جا سکے۔

ہندوستھان سماچار

---------------

ہندوستان سماچار / انظر حسن