کانگریس پر گیس بحران کا پروپیگنڈا کرنے کا الزامممبئی ، 14 مارچ (ہ س)۔ مہاراشٹر کے وزیر اعلیٰ دیویندر فڑنویس نے کہا ہے کہ ریاست میں گھریلو ایل پی جی گیس کی کوئی کمی نہیں ہے اور کانگریس پارٹی گیس کی قلت کے بارے میں غلط پروپیگنڈا کر رہی ہے۔ انہوں نے یہ بیان ہفتہ کو چندرپور میں صحافیوں سے گفتگو کرتے ہوئے دیا۔وزیر اعلیٰ فڑنویس نے کہا کہ ریاست میں روزانہ گھریلو گیس کی طلب تقریباً 9,000 میٹرک ٹن ہے جبکہ پیداوار بڑھا کر 11,000 میٹرک ٹن کر دی گئی ہے۔ ان کے مطابق اس اضافی پیداوار کے باعث مہاراشٹر میں گیس سلنڈروں کی کوئی کمی نہیں ہے۔ انہوں نے عوام سے اپیل کی کہ وہ صبر اور اطمینان کا مظاہرہ کریں۔انہوں نے کہا کہ وزیر اعظم نریندر مودی کی قیادت میں نہ صرف مہاراشٹر بلکہ پورے ملک میں گیس کی کمی نہیں ہے، تاہم کانگریس اس معاملے میں غلط معلومات پھیلا رہی ہے۔اس موقع پر مہاراشٹر کے وزیر خوراک و رسد چھگن بھجبل نے بتایا کہ مارچ کے مہینے میں گزشتہ چھ ماہ کے مقابلے میں زیادہ گیس سلنڈر فراہم کیے گئے ہیں۔ انہوں نے کہا کہ پیٹرول اور ڈیزل کا بھی وافر ذخیرہ موجود ہے اور ریفائنریاں مکمل صلاحیت کے ساتھ کام کر رہی ہیں۔ انہوں نے مزید کہا کہ عوام کو یقین رکھنا چاہیے کہ گھریلو گیس سلنڈروں کی سپلائی مسلسل جاری رہے گی۔ ریاستی حکومت نے گیس سلنڈر کی تقسیم کے لیے نئے ضابطے بھی جاری کیے ہیں۔ ان ضابطوں کے تحت اسپتالوں، سرکاری آشرم اسکولوں، امداد یافتہ آشرموں، اسکول ہاسٹلوں، سرکاری کینٹینوں، مڈ ڈے میل اسکیم اور آنگن واڑی مراکز کو 100 فیصد گیس سپلائی دینے کے احکامات جاری کیے گئے ہیں۔گیس ایجنسیوں کو ان اداروں کی سپلائی سے متعلق روزانہ رپورٹ پیش کرنے کی ہدایت دی گئی ہے۔ اس کے علاوہ ریاست میں کینٹینوں کو 70 فیصد گیس سپلائی کرنے کا حکم دیا گیا ہے۔ اسی طرح فارماسیوٹیکل صنعت، بیج پروسیسنگ یونٹس اور ماہی پروری کے کاروبار کو 50 فیصد گیس سپلائی فراہم کرنے کی ہدایت دی گئی ہے جبکہ ریلوے، دفاعی شعبہ، پولیس جیل اور فضائی نقل و حمل کے شعبوں کو 70 فیصد گیس سپلائی فراہم کی جائے گی۔چھگن بھجبل نے بتایا کہ گیس سپلائی چین کی نگرانی کے لیے ضلعی سطح پر خصوصی کمیٹیاں قائم کی گئی ہیں جن کی قیادت ضلع کلکٹر اور سپرنٹنڈنٹ آف پولیس کریں گے۔ ان کمیٹیوں کا مقصد یہ یقینی بنانا ہے کہ اسپتالوں، اسکولوں، آشرموں اور دیگر ضروری خدمات کو گیس کی فراہمی ترجیحی بنیادوں پر جاری رہے۔ہندوستھان سماچار
--------------------
ہندوستان سماچار / جاوید این اے
