نئی دہلی، 27 فروری (ہ س)۔ نئی مجموعی گھریلو مصنوعات (جی ڈی پی) سیریز نے اگلے مالی سال 2026-27 کے لیے اقتصادی ترقی کی پیشن گوئی کو 0.20 فیصد پوائنٹس سے بڑھا کر 7 سے 7.4 فیصد کر دیا ہے۔ رواں مالی سال 2025-26 میں جی ڈی پی کی شرح نمو 7.6 فیصد رہنے کا تخمینہ لگایا گیا ہے جو کہ پچھلے مالی سال 2024-25 میں 7.1 فیصد تھا۔
ملک کے چیف اکنامک ایڈوائزر (سی ای اے) وی اننتھا ناگیشورن نے جمعہ کو نئی جی ڈی پی سیریز کی ریلیز کے موقع پر ایک پریس کانفرنس سے خطاب کرتے ہوئے یہ بات کہی۔
ناگیشورن نے کہا، ہم مالی سال 2026-27 کے لیے اپنی اقتصادی ترقی کی پیشن گوئی کو پہلے کے 6.8-7.2 فیصد سے بڑھا کر 7.0-7.4 فیصد کر رہے ہیں۔ تاہم، معیشت کے 7 فیصد کے بجائے 7.4 فیصد کے قریب بڑھنے کا امکان زیادہ ہے، ناگیشورن نے کہا۔
ناگیشورن نے کہا کہ مالی سال 2026-27 کے لیے جی ڈی پی کی ترقی کی پیشن گوئی نئی سیریز میں بڑھا کر 7-7.4 فیصد کر دی گئی ہے۔ جنوری میں پارلیمنٹ میں پیش کیے گئے اقتصادی سروے میں آئندہ مالی سال 2026-27 کے لیے شرح نمو 6.8-7.2 فیصد رہنے کا تخمینہ لگایا گیا تھا۔
شماریات اور پروگرام کے نفاذ کی وزارت نے سالانہ اور سہ ماہی قومی کھاتوں کے تخمینوں کی ایک نئی سیریز جاری کی ہے، جس کا بنیادی سال 2022-23 مقرر کیا گیا ہے۔ اس سے پہلے بیس سال 2011-12 تھا۔ نئی قومی آمدنی کی سیریز کے مطابق، رواں مالی سال 2025-26 کے لیے جی ڈی پی کی شرح نمو 7.6 فیصد رہنے کا امکان ہے، جو پچھلے مالی سال کے 7.1 فیصد سے زیادہ ہے۔
ناگیشورن نے کہا کہ موجودہ اقتصادی اشاریوں کی بنیاد پر، موجودہ قیمتوں پر جی ڈی پی کی شرح نمو تقریباً 11 فیصد ہو سکتی ہے، جبکہ معیشت کا حجم آسانی سے ڈالر4 ٹریلین کو عبور کر سکتا ہے۔ انہوں نے یہ بھی کہا کہ ہندوستانی معیشت مضبوط ترقی کی رفتار کو برقرار رکھے ہوئے ہے، جس کی حمایت وسیع البنیاد سرگرمیوں سے ہوتی ہے۔
دراصل، بنیادی سال کو تبدیل کرنے کا مقصد معیشت کے موجودہ ڈھانچے اور سرگرمیوں کو زیادہ درست طریقے سے ظاہر کرنا ہے۔
---------------
ہندوستان سماچار / عبدالسلام صدیقی
