جموں, 23 فروری (ہ س)۔ فوج کی وائٹ نائٹ کور نے پیر کو بتایا کہ ضلع کشتواڑ کے چھاترو علاقے میں 326 روز تک جاری رہنے والے ایک طویل اور بلند پہاڑی مشترکہ آپریشن کے دوران سات خطرناک دہشت گردوں کو ہلاک کر دیا گیا۔فوج کی جانب سے جاری بیان کے مطابق اس آپریشن کو گیلنٹ پرسیویرنس کا نام دیا گیا تھا، جس کے تحت دشوار گزار پہاڑی علاقوں اور سخت موسمی حالات میں مسلسل کارروائیاں انجام دی گئیں۔ آپریشن سول اور فوجی انٹیلی جنس ایجنسیوں کی فراہم کردہ مستحکم اطلاعات کی بنیاد پر شروع کیا گیا تھا۔

بیان میں کہا گیا ہے کہ فوجی دستوں نے جموں و کشمیر پولیس اور سی آر پی ایف کے ساتھ قریبی تال میل میں کام کرتے ہوئے شدید سردی، بارش اور برفانی حالات کے باوجود دہشت گردوں کا تعاقب جاری رکھا۔ کارروائی کے دوران کئی مرتبہ آمنا سامنا ہوا اور بالآخر تمام سات دہشت گرد مارے گئے۔

فوج کے مطابق آپریشن میں جدید ٹیکنالوجی جیسے ایف پی وی ڈرونز، سیٹلائٹ امیجری، آر پی ایز/یو اے ویز اور جدید مواصلاتی نظام کا بھرپور استعمال کیا گیا۔بیان میں مزید کہا گیا کہ سیف اللہ اور اس کے ساتھیوں کی ہلاکت سے علاقے میں سرگرم دہشت گرد نیٹ ورک کو بڑا نقصان پہنچا ہے اور یہ کامیابی سیکورٹی فورسز کے عزم، بہادری اور پیشہ ورانہ مہارت کی عکاس ہے۔

ہندوستھان سماچار

---------------

ہندوستان سماچار / محمد اصغر