واشنگٹن، 22 فروری (ہ س)۔ امریکہ کے جے پی مورگن بینک نے پہلی بار تسلیم کیا ہے کہ اس نے 06 جنوری 2021 کو یو ایس کیپٹل پر ہوئے حملوں کے بعد سیاسی اور قانونی نتائج کے تحت صدر ڈونالڈ ٹرمپ کے نجی اور ان کے کئی تجارتی بینک کھاتوں کو بند کر دیا تھا۔ اس قانونی لڑائی میں یہ سب سے بڑا اعتراف ہے۔

امریکی نیوز چینل سی این بی سی کی رپورٹ کے مطابق، یہ بات اس ہفتے بینک اور اس کے (سی ای او) جیمی ڈمن کے خلاف ٹرمپ کے مقدمے میں عدالت میں جمع کیے گئے حلف نامے میں سامنے آئی ہے۔ صدر ٹرمپ نے بینک پر پانچ بلین امریکی ڈالر (ہندوستانی کرنسی میں تقریباً 45,363.43 کروڑ روپے) کا مقدمہ کیا ہے۔ اس میں الزام لگایا گیا ہے کہ ان کے کھاتے سیاسی وجوہات کی بنا پر بند کیے گئے۔ اس سے ان کی تجارت میں رکاوٹ آئی۔

جے پی مورگن بینک کے سابق چیف ایڈمنسٹریٹو آفیسر ڈین ولکیننگ نے حلف نامے میں لکھا، ’’فروری 2021 میں، جے پی مورگن نے مدعی کو بتایا تھا کہ جے پی مورگن کے سی بی اور پی بی میں رکھے گئے کچھ کھاتے بند کر دیے جائیں گے۔‘‘ قابل ذکر ہے کہ پی بی اور سی بی کا مطلب جے پی مورگن کا پرائیویٹ بینک اور کمرشیل بینک ہے۔ اس سے قبل جے پی مورگن نے کبھی یہ تسلیم نہیں کیا تھا کہ اس نے صدر کے کھاتے بند کیے ہیں۔

ٹرمپ نے شروع میں جے پی مورگن پر فلوریڈا اسٹیٹ کورٹ میں کیس کیا۔ بینک نے عدالت سے اپیل کی ہے کہ کیس کو نیویارک منتقل کر دیا جائے۔ ٹرمپ نے بینک پر تجارتی ہتک عزت کا الزام لگایا ہے۔ ٹرمپ کے وکیلوں کا الزام ہے کہ جے پی مورگن نے صدر اور ان کی کمپنیوں کو بلیک لسٹ میں ڈالا۔ وکیلوں نے بیان میں کہا، ’’ایک بڑی بات یہ ہے کہ بینک نے تسلیم کر لیا ہے کہ اس نے غیر قانونی اور جان بوجھ کر کھاتے بند کیے۔‘‘ ٹرمپ آرگنائزیشن نے مارچ 2025 میں کریڈٹ کارڈ کی بڑی کمپنی کیپٹل ون پر اسی طرح کی وجوہات اور الزامات کے لیے کیس کیا تھا۔ اس کیس کا ابھی تک فیصلہ نہیں ہوا ہے۔

ہندوستھان سماچار

---------------

ہندوستان سماچار / انظر حسن