کینبرا، 19 فروری (ہ س)۔ نئی آسٹریلیائی کپتان سوفی مولینکس کی قیادت میں آسٹریلیائی خواتین ٹیم نے شاندار واپسی کرتے ہوئے بھارت کو 19 رن سے شکست دے کر تین میچوں کی ٹی20 انٹر نیشنل سیریز 1-1 سے برابر کر دی۔ سڈنی میں بارش سے متاثرہ پہلا میچ ڈی ایل ایس طریقہ سے ہارنے کے بعد، آسٹریلیا نے کینبرا کے مانوکا اوول میں زبردست کارکردگی کا مظاہرہ کیا۔ سیریز کا فیصلہ کن میچ اب ہفتے کو ایڈیلیڈ میں کھیلا جائے گا۔
ہندوستانی کپتان ہرمن پریت کور نے ٹاس جیت کر آسٹریلیا کو پہلے بیٹنگ کی دعوت دی۔ آسٹریلیا پہلے دو اوورز میں صرف آٹھ رنز بنا سکی لیکن جارجیا وال نے پھر جارحانہ انداز میں چارج سنبھال لیا۔
نوجوان بلے باز جارجیا وال نے 57 گیندوں پر 88 رنز کی شاندار اننگز کھیلی جس میں 11 چوکے اور ایک چھکا شامل تھا۔ دوسرے سرے پر بیتھ مونی نے شاندار کارکردگی کا مظاہرہ کرتے ہوئے 39 گیندوں پر 46 رنز بنائے۔ دونوں نے پہلی وکٹ کے لیے 89 گیندوں پر 128 رنز کی ابتدائی شراکت داری کی، جو اس فارمیٹ میں بھارت کے خلاف آسٹریلیا کی سب سے بڑی اوپننگ شراکت ہے۔
مونی کے آؤٹ ہونے کے بعد ہندوستان نے واپسی کی کوشش کی۔ اروندھتی ریڈی نے درست گیند بازی کرتے ہوئے 30 رنز کے عوض دو وکٹیں حاصل کیں اور 17ویں اوور میں وال کو بھی آؤٹ کیا۔ ہندوستانی گیند بازوں نے آخری چار اوورز میں زبردست واپسی کرتے ہوئے آسٹریلیا کو 20 اوورز میں 5 وکٹ پر 163 تک محدود کر دیا۔
164 کے ہدف کے تعاقب میں بھارت نے پاور پلے میں بغیر کوئی وکٹ کھوئے 54 رنز بنائے۔ شیفالی ورما اور اسمرتی مندھانا نے تیز شروعات فراہم کی۔ تاہم اس کے بعد میچ کا رخ بدل گیا۔
سوفی مولینکس بولنگ کرنے آئے اور شیفالی ورما کو ایل بی ڈبلیو آؤٹ کر دیا۔ اس کے بعد ایشلے گارڈنر نے جمائمہ روڈریگز کو صرف چار رنز پر آؤٹ کیا۔ کم گارتھ نے اسمرتی مندھانا کو وکٹ کیپر بیتھ مونی کے ہاتھوں کیچ کرایا۔ ہندوستان نے نو اوورز کے اندر تین اہم وکٹیں گنوائیں، جس سے رن ریٹ پر دباؤ بڑھ گیا۔
ہرمن پریت کور (36) اور ریچا گھوش نے 55 رنز کی شراکت داری سے ٹیم کو میچ میں برقرار رکھنے کی کوشش کی لیکن کم گارتھ نے ہرمن پریت کو آؤٹ کرکے اس شراکت کو توڑ دیا۔ اس کے بعد ہندوستانی اننگز ڈگمگا گئی اور سات رنز پر چھ وکٹیں گنوا دیں۔ ہندوستان مقررہ 20 اوورز میں 9 وکٹ پر 144 رنز ہی بنا سکا۔
آسٹریلیا کی جانب سے ایشلے گارڈنر نے 22 رنز کے عوض تین وکٹیں حاصل کیں جبکہ اینابیل سدرلینڈ نے 18 رنز کے عوض دو وکٹیں لے کر اہم کردار ادا کیا۔
مختصر اسکور: آسٹریلیا 163/5 (20 اوورز) — جارجیا وال 88، بیتھ مونی 46؛ اروندھتی ریڈی 2/30۔
انڈیا 144/9 (20 اوورز) — ہرمن پریت کور 36؛ ایشلی گارڈنر 3/22، اینابیل سدرلینڈ 2/18۔
آسٹریلیا کی ٹیم 19 رنوں سے جیت گئی۔
---------------
ہندوستان سماچار / عبدالواحد
