کینبرا، 19 فروری (ہ س)۔ ہندوستانی خواتین کرکٹ ٹیم کی کپتان ہرمن پریت کور نے تاریخ رقم کرتے ہوئے خواتین بین الاقوامی کرکٹ میں سب سے زیادہ میچ کھیلنے کا ریکارڈ اپنے نام کر لیا۔ انہوں نے یہ تاریخی کارنامہ آسٹریلیا کے خلاف تین ٹی 20 میچوں کی سیریز کے دوسرے میچ میں میدان میں اترتے ہی انجام دیا۔

ہرمن پریت نے 19 فروری کو نیوزی لینڈ کی لیجنڈ سوزی بیٹس کو پیچھے چھوڑ کر خواتین کی بین الاقوامی کرکٹ کی تاریخ میں اپنا 356 واں بین الاقوامی میچ کھیلتے ہوئے سب سے زیادہ میچ کھیلنے والی کھلاڑی بن گئیں۔

سب سے زیادہ بین الاقوامی مقابلے کھیلنے والی کھلاڑیوں کی فہرست میں آسٹریلیا کی ایلیس پیری (349 میچز) تیسرے نمبر پر ہیں۔ ہندوستان کی سابق کپتان میتھالی راج نے 333 میچ کھیلے ہیں جبکہ انگلینڈ کی شارلٹ ایڈورڈز نے 309 میچوں میں اپنے ملک کی نمائندگی کی ہے۔ اس کے علاوہ، سوفی ڈیوائن (305)، ہیدر نائٹ (303) اور ڈینی وائٹ ہوز (302) بھی فہرست میں شامل ہیں۔

36 سالہ ہرمن پریت کور نے اب تک چھ ٹیسٹ، 161 ون ڈے اور 189 ٹی 20 انٹرنیشنل کھیلے ہیں۔ اس نے ٹیسٹ میں 200 رن بنائے ہیں، جب کہ اس نے ون ڈے میں 4,409 اور ٹی 20 انٹرنیشنل میں 3,784 رن بنائے ہیں۔

بین الاقوامی کرکٹ کے علاوہ، ہرمن پریت نے 35 ویمنز پریمیئر لیگ، 62 ویمنز بگ بیش لیگ اور 10 دی ہنڈریڈ میچز بھی کھیلے ہیں۔

قابل ذکر ہے کہ ان کی کپتانی میں ہندوستانی خواتین ٹیم نے 2025 ورلڈ کپ کے فائنل میں جنوبی افریقہ کو 52 رنز سے شکست دے کر پہلی بار عالمی اعزاز حاصل کیا تھا۔

دوسرے ٹی 20 میچ کے ٹاس کے دوران اس کامیابی پر ردعمل کا اظہار کرتے ہوئے ہرمن پریت نے کہا کہ یہ میرے لیے بہت بڑی کامیابی ہے، مجھے امید ہے کہ میں ٹیم کے لیے سخت محنت کرتی رہوں اور جتنا ممکن ہو سکے ، کھیلتی رہوں ۔ “

ہندوستھان سماچار

ہندوستان سماچار / محمد شہزاد