نئی دہلی، 18 فروری (ہ س)۔ مرکزی وزیر اطلاعات و نشریات اشونی ویشنو نے انڈیا اے آئی امپیکٹ سمٹ کے دوسرے دن ‘ویوز کریئیٹرز کارنر’ کا افتتاح کیا۔ یہ پلیٹ فارم مکمل طور پر ایک اختراعی مرکز ہے، جہاں مصنوعی ذہانت کے ذریعے اینیمیشن، وی ایف ایکس، گیمنگ، کامکس اور ایکسٹینڈڈ ریئلٹی جیسی ٹیکنالوجیوں کے نئے تجربات پیش کیے جا رہے ہیں۔

مرکزی وزارتِ اطلاعات و نشریات کے مطابق، افتتاح کے دوران ویشنو نے پویلین کا دورہ کیا اور ویوایکس اسٹارٹ اپ گروپ کے کاروباری افراد کے ساتھ ساتھ اڈوب، نیٹ فلکس، سونی اور ایمیزون جیسی بڑی کمپنیوں کے عہدیداران سے بھی بات چیت کی۔ انہوں نے کہا کہ یہ پلیٹ فارم وزارت کی اسکیموں جیسے ویوایکس، ویوز بازار اور کریئیٹ اِن انڈیا چیلنجز کی توسیع ہے۔

اس موقع پر میڈیا اور تفریحی شعبے کے 51 اسٹارٹ اپس نے اپنی اے آئی پر مبنی ٹیکنالوجی اور نئے تجربات پیش کیے۔ ان میں بھاشا سیتو اور کلا سیتو چیلنجز کے فاتحین بھی شامل تھے۔ ویشنو نے ان کاروباری افراد سے گفتگو کی اور ان کی کاوشوں کو سراہا۔

انہوں نے کہا کہ اے آئی معاشرے پر گہرا اثر ڈال رہی ہے اور یہ ٹیکنالوجی دیہی ہندوستان کے نوجوانوں کو عالمی معیار کے اسٹارٹ اپ قائم کرنے کا موقع فراہم کر رہی ہے۔ پویلین میں جدید ٹیکنالوجیوں کا مظاہرہ کیا گیا، جن میں ریئل ٹائم گیم ڈیولپمنٹ، پرامپٹ ٹو سنیما لائیو اسٹوڈیو، اے آئی پر مبنی نیوز روم، آواز کی فوری نقل کرنے والی ٹیکنالوجی، کثیر لسانی چیٹ ایپ، 270 ڈگری اے آئی فلم ڈسپلے، چہرے اور آواز کی عمر تبدیل کرنے والی ٹیکنالوجی اور بغیر مارکر کے موشن کیپچر جیسی سہولیات شامل تھیں۔

ویشنو نے آئی آئی سی ٹی کی بھی تعریف کی، جس نے تخلیقی تعلیم میں اے آئی کو شامل کرکے طلبہ کو بدلتی ہوئی صنعت کی ضروریات کے مطابق تیار کرنے کا اقدام کیا ہے۔ انہوں نے کہا کہ ویوز کریئیٹرز کارنر پورے کانفرنس کے دوران ماہرین کی گفتگوؤں، فلم سازوں کی ماسٹر کلاسز اور تکنیکی سیشنز کی میزبانی کرتا رہے گا۔

ہندوستھان سماچار

---------------

ہندوستان سماچار / عبدالواحد