شملہ، 9 جنوری (ہ س)۔ ہماچل پردیش میں جنوری کے آغاز کے ساتھ ہی سردی ریکارڈ توڑنے والی سطح پر پہنچ گئی ہے اور پہاڑوں سے لے کر میدانی علاقوں تک سردی کی لہر کا وسیع اثر دیکھاجا رہا ہے۔ ریاست کے 12 شہروں میں کم سے کم درجہ حرارت نقطہ انجماد سے نیچے گر گیا ہے، جب کہ میدانی علاقوں میں بھی درجہ حرارت معمول سے کئی ڈگری نیچے گر گیا ہے۔

موسمیاتی مرکز شملہ کے مطابق، ریاست میں اگلے ہفتے تک موسم خشک رہے گا، کہیں بھی بارش یا برفباری کی توقع نہیں ہے۔ 10 سے 13 جنوری تک چار روز تک دھند کی وارننگ جاری کی گئی ہے۔ آج بلاس پور میں 100 میٹر تک حدنگاہ کے ساتھ گھنا کوہرادرج کیا گیا، جبکہ منڈی اور اونا میں ہلکی دھند ریکارڈ کی گئی۔

جمعہ کو جاری کردہ اعداد و شمار کے مطابق، شملہ میں کم سے کم درجہ حرارت 1.6 ڈگری سیلسیس، سندر نگر میں منفی 0.3، بھونتر میں منفی 1.4، کلپا منفی 3.8، پالم پور منفی 0.5، سولن میں منفی 2.2، منالی میں منفی 1.4، کوکمسیری میں منفی 10.6، تابو میں مائنس 8.4، ریکانگ پیو میں منفی 1.9، باجورہ میں منفی 0.6 اور سیو باغ میں منفی 2.3 ڈگری سیلسیس درج کیا گیا۔ میدانی علاقوں کی بات کریں تو ہمیر پور میں کم از کم درجہ حرارت 0.7 ڈگری تک پہنچ گیا،جو اس موسم سرمامیں پہلی بار صفر کے قریب درج کیا گیا ہے۔ بلاس پور میں کم سے کم درجہ حرارت 3.5، اونا میں 5.4، ناہن میں 4.0 اور پاونٹا صاحب میں 5.0 ڈگری ریکارڈ کیا گیا۔

محکمہ موسمیات نے منڈی، کانگڑا، ہمیر پور اور برٹھیں میں شدید سردی کی لہر کی تصدیق کی ہے، جب کہ بلاس پور، پالم پور اور نیری میں سردی کی لہر کے حالات ریکارڈ کیے گئے ہیں۔ سردی کا اثر صرف عوامی زندگی تک محدود نہیں ہے۔ اونچائی والے علاقوں میں پینے کے پانی کے ذرائع منجمد ہو گئے ہیں جس سے دیہی علاقوں میں پانی کی قلت بڑھ گئی ہے۔ کئی گاووں میں پائپ لائنیں جم جانے کی وجہ سے لوگوں کو پانی کی قلت کا سامنا ہے۔

دریں اثنا، ریاست کو گزشتہ تین ماہ سے مناسب بارش اور برف باری کی کمی کی وجہ سے خشک سالی جیسی صورتحال کا سامنا ہے۔ اس کا براہ راست اثر ربیع کی آئندہ فصلوں جیسے گیہوں، جو، سرسوں اور سیب سمیت دیگر پھلوں پر پڑ رہا ہے۔ باغبانوں اور کاشتکاروں کی پریشانیوں میں بھی اضافہ ہوا ہے کیونکہ سردی کے باوجود ٹھنڈ کے مطلوبہ اوقات پورے نہیں ہورہے ہیں۔ شملہ اور منالی جیسے اہم سیاحتی پہاڑی مقامات پر ابھی تک موسم کی پہلی برف باری نہیں ہوئی ہے۔ ناسازگار موسم کے سبب سیاحوں میں مایوسی دیکھی جا رہی ہے، ہوٹل کا کاروبار بھی متاثر ہو رہا ہے۔

محکمہ موسمیات کی پیشگوئی کے مطابق 15 جنوری تک موسم خشک رہے گا اور 9 سے 13 جنوری تک رات گئے اور صبح سویرے مختلف مقامات پر دھند پڑنے کا امکان ہے جب کہ سردی کی لہر کا اثر پہلے دو روز تک برقرار رہ سکتا ہے۔

ہندوستھان سماچار

ہندوستان سماچار / محمد شہزاد