جموں, 09 جنوری (ہ س)۔ آل انڈیا کانگریس کمیٹی کی اپیل پر ملک گیر 45 روزہ احتجاجی تحریک کے تحت جموں میں آج منریگا بچاؤ مہم کا باقاعدہ آغاز کیا گیا۔ اس مہم کی قیادت کانگریس کی سینئر قیادت نے کی، جس میں جموں و کشمیر انچارج اور رکن پارلیمان ڈاکٹر سید ناصر حسین اور جموں و کشمیر پردیش کانگریس کمیٹی کے صدر طارق حمید قرا پیش پیش رہے۔

جموں کے پلوڑا علاقے میں واقع کشمیر ہلز ریزورٹ میں منعقدہ پروگرام میں پارٹی کے سینئر رہنماؤں، موجودہ و سابق اراکین اسمبلی، سابق وزراء، نومنتخب ضلعی صدور، فرنٹل تنظیموں کے عہدیداروں، بلاک صدور اور بڑی تعداد میں کانگریس کارکنوں نے شرکت کی۔

اس موقع پر خطاب کرتے ہوئے ڈاکٹر سید ناصر حسین نے کہا کہ یو پی اے حکومت نے سابق وزیر اعظم ڈاکٹر منموہن سنگھ کی قیادت میں آئین کی روح کے مطابق عوام کو قانونی حقوق اور ضمانتیں فراہم کرنے کے لیے کئی تاریخی قوانین نافذ کیے تھے، جن میں منریگا (حقِ روزگار)، حقِ اطلاعات، حقِ تعلیم، قومی غذائی تحفظ قانون اور جنگلاتی حقوق قانون شامل ہیں۔ انہوں نے الزام عائد کیا کہ موجودہ مودی حکومت ان آئینی اور قانونی حقوق کو منظم طریقے سے کمزور یا ختم کرنے کی کوشش کر رہی ہے۔

انہوں نے کہا کہ منریگا، جو ہر سال 100 دن کے روزگار کی قانونی ضمانت دیتا ہے، دنیا کی سب سے بڑی دیہی روزگار اسکیم رہی ہے، جس نے غریبوں اور بے زمین مزدوروں کو سہارا دیا اور جبری نقل مکانی کو روکا۔ ان کا کہنا تھا کہ اگرچہ بی جے پی آئین میں تبدیلی کے لیے مطلوبہ عددی ہدف حاصل نہیں کر سکی، تاہم وہ آئینی و قانونی حقوق کو کمزور کرنے کی راہ پر گامزن ہے۔

جموں و کشمیر پردیش کانگریس کے صدر طارق حمید قرا نے اپنے خطاب میں کہا کہ مہاتما گاندھی کے نام سے منسوب تاریخی دیہی روزگار اسکیم کی روح اور ڈھانچے کو بدل کر غریبوں سے ان کا حقِ روزگار چھینا جا رہا ہے۔ انہوں نے کہا کہ یہ اسکیم ملک بھر کے کروڑوں دیہی غریبوں کے لیے روزگار کی قانونی ضمانت تھی۔

طارق قرا نے واضح کیا کہ کانگریس پارٹی جموں و کشمیر میں پہلے ہی ’ہماری ریاست، ہمارا حق‘ کے نعرے کے تحت ریاستی درجہ کی بحالی کی تحریک چلا رہی ہے، جسے منریگا بچاؤ مہم کے ساتھ جوڑا جائے گا۔

اس موقع پر آل انڈیا کانگریس کمیٹی کی سکریٹری اور جموں و کشمیر کی شریک انچارج دیویا مدیرنا نے کہا کہ منریگا یو پی اے قیادت، بالخصوص سونیا گاندھی اور ڈاکٹر منموہن سنگھ کی دوراندیش سوچ کا نتیجہ ہے، جس نے غریب طبقے کو روزگار کا قانونی حق فراہم کیا۔ انہوں نے الزام لگایا کہ موجودہ حکومت غریبوں کو کچل کر وسائل پر کنٹرول کارپوریٹ اور چند سرمایہ داروں کے حوالے کرنا چاہتی ہے۔

---------------

ہندوستان سماچار / محمد اصغر