بورن ماوتھ، 4 جنوری (ہ س)۔ ڈیکلان رائس کے دو گول کی بدولت آرسنل نے خراب شروعات سے ابھرتے ہوئے ہفتہ کو بورن ماوتھ کو اس کے گھریلو میدان پر 2-3 سے شکست دی اور پریمیئر لیگ ٹیبل میں ٹاپ پر اپنی سبقت چھ پوائنٹس تک بڑھا لی۔

چوٹ کے سبب ایسٹن ولا کے خلاف 1-4 کی ہار والا میچ مس کرنے کے بعد واپسی کر رہے رائس نے دوسرے ہاف کی شروعات میں ڈورڈے پیٹرووچ کو چکمہ دیتے ہوئے گول کر کے آرسنل کو سبقت دلائی۔ اس کے بعد سبسٹی ٹیوٹ بکایو ساکا کے شاندار سیٹ اپ پر انہوں نے اپنا دوسرا گول داغا۔

حالانکہ مقابلے کی شروعات آرسنل کے لیے اچھی نہیں رہی۔ 10 ویں منٹ میں ڈیفینڈر گیبریل کی نادر غلطی کا بورن ماوتھ نے پورا فائدہ اٹھایا، جب ان کے غلط پاس پر ایوانیلسن نے آسانی سے گول کر کے میزبان ٹیم کو سبقت دلا دی۔ لیکن گیبریل نے چھ منٹ بعد ہی برابری کا گول کر کے اپنی غلطی سدھار لی۔

رائس کے دو گول کے بعد آرسنل میچ پر پکڑ بناتا دکھ رہا تھا، لیکن سبسٹی ٹیوٹ جونیئر کروپی نے ڈیوڈ رایا کو چکمہ دیتے ہوئے گول کر کے مقابلے کو پھر دلچسپ بنا دیا۔ اس کے باوجود مائیکل آرٹیٹا کی ٹیم نے دباو جھیلتے ہوئے مسلسل پانچویں جیت درج کی۔

اس جیت کے ساتھ آرسنل کے 20 میچوں میں 48 پوائنٹس ہو گئے ہیں۔ ایسٹن ولا 42 پوائنٹس کے ساتھ دوسرے مقام پر ہے، جبکہ ایک میچ کم کھیل چکا مانچسٹر سٹی 41 پوائنٹس پر ہے۔ سٹی اتوار کو چیلسی کے خلاف جیت کے ساتھ فرق چار پوائنٹس تک کم کرنے کی کوشش کرے گا۔

میچ میں رائس کی کارکردگی فیصلہ کن رہی۔ گھٹنے کی چوٹ سے ابھر کر لوٹے رائس نے مڈ فیلڈ میں شاندار کنٹرول دکھایا اور یکم نومبر کے بعد اپنے پہلے لیگ گول کیے۔ ان کا پہلا گول کپتان مارٹن اوڈیگارڈ کے پاس پر باکس کے باہر سے درست شاٹ کے ذریعے آیا۔

آرسنل کی بینچ اسٹرینتھ بھی دیکھنے لائق رہی۔ آرٹیٹا نے آخری 20 منٹ میں لیانڈرو ٹروسارڈ، گیبریل جیسس اور ساکا کو میدان میں اتارا اور ساکا کی موجودگی نے ہی رائس کے دوسرے گول کی بنیاد رکھی۔

وہیں بورن ماوتھ کی مشکلیں بڑھتی جا رہی ہیں۔ ٹیم اب لگاتار 11 لیگ میچوں سے جیت درج نہیں کر سکی ہے اور ٹرانسفر ونڈو میں فارورڈ انٹونی سیمینیو کے جانے کا بھی امکان جتایا جا رہا ہے۔ مانچسٹر سٹی سے جڑے سیمینیو نے آخری سیٹی کے بعد مداحوں کی طرف ہاتھ ہلایا اور سرنگ کی طرف بڑھ گئے۔

ٹیبل میں طویل وقت سے ٹاپ پر قابض آرسنل نے ایک بار پھر دکھا دیا کہ اس سیزن وہ دباو میں بھی جیت نکالنے کی صلاحیت رکھتا ہے اور 2004 کے بعد پہلی بار خطاب جیتنے کی اس کی دعویداری بے حد مضبوط ہے۔

ہندوستھان سماچار

---------------

ہندوستان سماچار / انظر حسن