نئی دہلی، 3 جنوری (ہ س)۔

بھارتیہ جنتا پارٹی (بی جے پی) نے مغربی بنگال میں سیلاب متاثرین کو دیے گئے معاوضے میں گھپلے کو لے کر ممتا بنرجی کو نشانہ بنایا۔ بی جے پی نے ممتا بنرجی حکومت پر حملہ کرتے ہوئے اسے مکمل طور پر بدعنوانی میں ڈوبی قرار دیا۔ ہفتہ کو یہاں بی جے پی ہیڈکوارٹر میں منعقدہ ایک پریس کانفرنس میں ترجمان کے کے شرما نے کہا کہ مغربی بنگال کے مالدہ ضلع میں سیلاب متاثرین کو ممتا بنرجی حکومت کی طرف سے دیے گئے معاوضے میں بدعنوانی کا الزام لگانے والی کئی درخواستیں ہائی کورٹ میں داخل کی گئی ہیں۔

ہائی کورٹ نے سی اے جی سے تحقیقات کرکے رپورٹ پیش کرنے کو کہا اور ہائی کورٹ میں پیش کی گئی سی اے جی کی رپورٹ کے کچھ حقائق اخبارات میں شائع ہوئے ہیں۔

انہوں نے کہا کہ ان حقائق کی بنیاد پر ممتا بنرجی کی حکومت پوری طرح سے بدعنوانی میں ڈوبی ہوئی ہے۔ سیلاب متاثرین کے نام پر رقوم کی لوٹ مار اور تقسیم میں تقریباً 100 کروڑ روپے کی کرپشن کا انکشاف ہوا ہے جو کہ انتہائی شرمناک ہے۔

کے کے شرما نے کہا کہ ایک ہی گھر کا معاوضہ ایک ہی بینک اکاو¿نٹ میں دو سے 42 مرتبہ تقسیم کیا گیا۔ یہ کرپشن اور لوٹ مار کی حد کو واضح کرتا ہے۔ جو لوگ بنیادی طور پر معاوضے کے حقدار تھے انہیں معاوضہ نہیں دیا گیا اور اس کے بجائے انہیں لوٹا گیا۔

انہوں نے کہا کہ تقریباً 108 افراد کو یہ سیلابی معاوضہ ملا۔ وہ یا تو عوامی نمائندے ہوں، سرکاری ملازم ہوں یا ترنمول کانگریس کے لیڈر ہوں۔ خاص طور پر، 7 کروڑ روپے ان لوگوں کو معاوضے کے طور پر تقسیم کیے گئے جنہوں نے معاوضے کے لیے درخواست بھی نہیں دی تھی۔

کے کے شرما نے کہا کہ اس سے اندازہ ہوتا ہے کہ ممتا بنرجی حکومت میں کس حد تک لوٹ مار ہوئی ہے۔ یہ بہت بدقسمتی کی بات ہے۔ اسمبلی انتخابات آنے والے ہیں، اور عوام اس لوٹ مار اور بدعنوانی کا جواب اپنے ووٹوں سے دیں گے اور ممتا بنرجی کی حکومت کا تختہ الٹ دیں گے۔

ہندوستھان سماچار

ہندوستان سماچار / عطاءاللہ