کولکاتہ میں درجہ حرارت میں اضافہ، جنوبی بنگال میں گھنے کوہرے کا الرٹ

کولکاتہ، 03 جنوری (ہ س)۔ مغربی بنگال میں موسم کا مزاج مسلسل بدل رہا ہے۔ کولکاتہ سمیت جنوبی بنگال میں کم از کم درجہ حرارت میں مزید اضافہ درج کیا گیا ہے۔ محکمہ موسمیات نے بتایا ہے کہ اگلے 24 گھنٹے میں جنوبی بنگال کے اضلاع میں درجہ حرارت دو سے تین ڈگری تک اور بڑھ سکتا ہے۔ اس کے بعد اگلے 24 گھنٹے درجہ حرارت تقریباً مستحکم رہنے کا امکان ہے۔ حالانکہ اس کے بعد پھر سے ٹھنڈ بڑھے گی اور اگلے دو دنوں میں درجہ حرارت میں دو سے تین ڈگری کی گراوٹ ہو سکتی ہے۔

محکمہ موسمیات کے مطابق، شمالی بنگال کے اضلاع میں اگلے 24 گھنٹے درجہ حرارت میں خاص تبدیلی کا امکان نہیں ہے، لیکن اس کے بعد کے تین دنوں میں درجہ حرارت مسلسل گر سکتا ہے اور پارہ قریب دو ڈگری تک نیچے آ سکتا ہے۔

اس درمیان شمالی بنگال کے سبھی اضلاع میں گھنے کوہرے کی وارننگ جاری کی گئی ہے۔ دارجلنگ، جلپائی گوڑی، کوچ بہار، شمالی دیناج پور، جنوبی دیناج پور اور مالدہ میں کوہرے کے سبب ویزیبلٹی (حد نگاہ) گھٹ کر 199 میٹر سے 50 میٹر تک پہنچ سکتی ہے۔ دارجلنگ میں سنیچر اور اتوار کو ہلکی بارش کے ساتھ برف باری کا بھی امکان ظاہر کیا گیا ہے۔ اس کے علاوہ جلپائی گوڑی، کلمپونگ اور علی پور دوار میں بھی کہیں کہیں ہلکی بارش ہو سکتی ہے۔

جنوبی بنگال کے کچھ اضلاع میں بھی گھنے کوہرے کو لے کر الرٹ جاری کیا گیا ہے۔ ندیا، شمالی 24 پرگنہ، جنوبی 24 پرگنہ، مشرقی میدنی پور، پرولیا، مشرقی بردھمان، مغربی بردھمان اور بیربھوم میں صبح کے وقت کوہرے کے سبب ویزیبلٹی گھٹ کر 50 میٹر تک آ سکتی ہے۔ حالانکہ جنوبی بنگال کے اضلاع میں فی الحال موسم خشک رہنے کا اندازہ ہے اور کہیں بھی بارش کا امکان نہیں ہے۔

ماہرین موسمیات کا کہنا ہے کہ ویسٹرن ڈسٹربنس کے اثر سے فی الحال ٹھنڈ کچھ کمزور پڑی ہے، لیکن جیسے ہی اس کا اثر کم ہوگا، جنوری کے دوسرے ہفتے میں ایک بار پھر ٹھنڈ زور پکڑ سکتی ہے۔

ہندوستھان سماچار

---------------

ہندوستان سماچار / انظر حسن