سرینگر 3 جنوری،( ہ س)۔جنوبی کشمیر کے کولگام میں پولیس نے ایک خاتون کا سراغ لگایا ہے جو 17 نومبر 2025 کو لاپتہ ہوگئی تھی، اور مسلسل کوششوں اور مربوط تحقیقات کے بعد اسے اس کے خاندان کے ساتھ ملایا۔ حکام نے بتایا کہ 26 نومبر 2025 کو پولیس اسٹیشن کولگام کو وسیم احمد وانی کی جانب سے ایک تحریری شکایت موصول ہوئی تھی جس میں کہا گیا تھا کہ ان کی اہلیہ بسمہ جان 17 نومبر سے کولگام کے امنو علاقے میں اپنے کرائے کی رہائش سے لاپتہ ہے۔ گمشدگی کی رپورٹ کے اندراج کے بعد کولگام پولیس کی طرف سے ڈی وائی ایس پی ہیڈ کوارٹر کولگام اور پولیس اسٹیشن کولگام کے اسٹیشن ہاؤس آفیسر کی قریبی نگرانی میں ایک جامع تلاشی آپریشن شروع کیا گیا۔ متعدد پولیس ٹیموں کو متحرک کیا گیا، اور لاپتہ خاتون کا سراغ لگانے کے لیے تمام دستیاب تکنیکی اور انسانی وسائل کو بروئے کار لایا گیا۔ کئی دنوں کی مسلسل کوششوں کے بعد پولیس ٹیم کو جالندھر سے خاتون کا پتہ لگانے میں کامیابی ملی۔ پولیس کا کہنا ہے کہ تمام ضروری قانونی اور طبی عمل مکمل کرنے کے بعد خاتون کو بحفاظت اس کے رشتہ داروں کے حوالے کر دیا گیا۔ تلاش کی گئی خاتون کے اہل خانہ نے اظہار تشکر اور راحت کا اظہار کیا اور کولگام پولیس کی جانب سے اس کی محفوظ واپسی کو یقینی بنانے میں فوری ردعمل، لگن اور پیشہ ورانہ مہارت کی تعریف کی۔ہندوستھان سماچار

ہندوستان سماچار / Aftab Ahmad Mir