واشنگٹن، 03 جنوری( ہ س)۔امریکی صدر ڈونلڈ ٹرمپ کے اس بیان کے بعد کہ اگر ایرانی پُر امن مظاہرین کو تشدد کا سامنا کرنا پڑا تو امریکہ انہیں تحفظ فراہم کرنے کے لیے تیار ہے۔ ایران کے کئی اعلیٰ حکام نے اس بیان کی سخت مذمت کی۔ اسی تناظر میں ایران نے جمعہ کی شام اقوام متحدہ کی سلامتی کونسل کو ایک با ضابطہ خط ارسال کیا۔اقوام متحدہ میں ایران کے مستقل مندوب سعید ایروانی نے کہا کہ ایران صدر ٹرمپ کے مداخلت پسندانہ اور اشتعال انگیز بیان کی مذمت کرتا ہے، کیونکہ یہ بیان امن و استحکام کے لیے خطرہ ہے۔ انہوں نے زور دیا کہ ایران اپنی خود مختاری، علاقائی سالمیت اور قومی سلامتی کے دفاع کا مکمل حق رکھتا ہے اور کسی بھی بیرونی مداخلت کے خلاف اپنے حقوق کو مضبوط اور متناسب انداز میں استعمال کرے گا۔ ایرانی مندوب نے خبردار کیا کہ ان غیر قانونی دھمکیوں کے نتیجے میں پیدا ہونے والی کسی بھی کشیدگی یا نتائج کی مکمل ذمہ داری امریکہ پر عائد ہو گی۔ایرانی وزیر خارجہ عباس عراقچی نے بھی امریکی بیانات کو مسترد کرتے ہوئے کہا کہ ایران اپنے داخلی معاملات میں کسی بھی قسم کی مداخلت کو قطعی طور پر قبول نہیں کرتا۔ انہوں نے واضح کیا کہ ایرانی مسلح افواج ملک کی خود مختاری کی خلاف ورزی کرنے والی کسی بھی کارروائی کا مقابلہ کرنے کے لیے تیار ہیں۔ اسی طرح اعلیٰ قومی سلامتی کونسل کے سربراہ علی لاریجانی اور ایرانی رہبر اعلیٰ کے مشیر علی شمخانی نے بھی ٹرمپ کے بیان پر سخت تنقید کی اور ایرانی داخلی امور میں مداخلت سے خبردار کیا۔ہندوستھان سماچار

ہندوستان سماچار / Mohammad Khan