گوہاٹی، 3 جنوری (ہ س)۔آسام کے چرانگ، بکسا، برپیٹا، اور درانگ اور تریپورہ کے اگرتلہ سے گرفتار امام محمودقافلہ (آئی ایم کے)ماڈیول سے منسلک گیارہ دہشت گردوں کا مقصد ریاست میں فرقہ وارانہ تشدد پھیلانا تھا۔ تحقیقات سے یہ بھی پتہ چلا ہے کہ ملزمان نے مبینہ طور پر نچلے آسام کے برپیٹا، چرانگ اور دیگر اضلاع میں فنڈ اکٹھا کرنا شروع کر دیا تھا۔ کچھ مساجد میں مبینہ طور پر لوگوں کو ہندوستانی ریاستوں کے خلاف مسلح تصادم پر اکسایا جا رہا تھا۔

آسام پولیس نے ہفتے کے روز بتایاکہ نسیم الدین، برپیٹا کے رہائشی، جس کی شناخت امیر کے طور پر ہوئی ہے، اپریل-مئی 2024 میں تریپورہ کے ایک ساتھی کے ساتھ بنگلہ دیش گیا تھا، جہاں اس نے میٹنگوں اور تربیتی سیشنوں میں حصہ لیا۔ پولیس کے مطابق ایس ٹی ایف تھانے کے مقدمہ نمبر 06/2025 کی تفتیش میں اہم پیش رفت ہوئی ہے جس میں انکشاف ہوا ہے کہ 2024 کے اواخر میں نسیم الدین عرف تمیم یوٹیوب چینل سے رابطے میں آیا۔ اس دوران اس کی بات چیت بنگلہ دیشی رہائشی خالد سے ہوئی جس نے بعد میں ٹیلی گرام کے ذریعے اس سے رابطہ کیا۔ اس ٹیلی گرام اکاؤنٹ سے مذہبی کتابیں، پی ڈی ایف، اور نام نہاد پیغامات بھیج کر بنیاد پرست نظریات کی تشہیر کی گئی ۔

پولیس کے مطابق خالد نے عمر، سوجان بن سلطان، بنگلہ دیش کے شمیم ​​براہ، مغربی بنگال کے میر رحمان اور اگرتلہ، تریپورہ کے جاگیر میاں کی ہدایت پر حدیث کی غلط تشریح کرتے ہوئے آنے کی بات کہی۔ اس کے بعد ٹیلی گرام پر’’پورو آکاش‘‘ کے نام سے ایک گروپ بنایا گیا، جس کا پہلا ایڈمن خالد تھا اور بعد میں نسیم الدین کو بنایا گیا۔ اس گروپ کے ذریعے ’’غزوہ ہند‘‘ سے متعلق پیغامات متعدد ممبران تک پہنچائے گئے۔

تحقیقات سے یہ بات بھی سامنے آئی کہ جن مذہبی کتابوں کا حوالہ دیا گیا ہے، ان کا اصل میں کوئی وجود ہی نہیں ہے۔ اس کے بعد یہ واضح ہو گیا کہ یہ سارا پروپیگنڈہ جعلی تھا اور اس کا تعلق کالعدم دہشت گرد تنظیم جماعت المجاہدین بنگلہ دیش (جے ایم بی) کے ذیلی گروپ ’’امام محمودقافلہ‘‘ (آئی ایم کے) نامی تنظیم سے تھا۔جے ایم بی کے سابق کیڈر جیول محمود عرف امام محمود حبیب اللہ عرف سہیل کے ذریعہ 2018 میں قائم کی گئی، یہ تنظیم غزوۃ الہند کے متشدد نظریے کی تشہیر کرتی ہے۔

ایس ٹی ایف حکام نے بتایا کہ کیس میں مزید تفتیش مرحلہ وار جاری ہے اور نیٹ ورک سے وابستہ دیگر افراد، فنڈنگ ​​کے ذرائع اور سرگرمیوں کی مکمل چھان بین کی جارہی ہے۔

ہندوستھان سماچار

ہندوستان سماچار / محمد شہزاد