بہار میں سردی کا قہر جاری، شدید ٹھنڈ اور کہرے سے معمولات زندگی درہم برہمپٹنہ، 3 جنوری (ہ س)۔ بہار میں شدید ٹھنڈ کا قہر فی الحال رکنے کے آثار نظر نہیں آرہے ہیں۔ پہاڑی علاقوں میں برف باری کا براہ راست اثر ریاست کے موسم پر پڑ رہا ہے جس کے نتیجے میں بیشتر اضلاع میں کولڈ ڈے جیسی صورتحال ہے۔ سردی اور دھند سے معمولات زندگی بری طرح متاثر ہوئے ہیں۔ ادھر محکمہ موسمیات نے آنے والے دنوں میں سردی کے ساتھ ہلکی بارش کی پیش گوئی کی ہے۔موسمیاتی مرکز پٹنہ کے مطابق ہفتہ کے روز راجدھانی پٹنہ سمیت ریاست کے کئی حصوں میں ہلکی سے درمیانی دھند چھائی رہی۔ شمالی بہار کے کئی اضلاع بشمول سیتامڑھی، شیوہر، مدھوبنی، سپول، ارریہ اور کشن گنج میں انتہائی گھنے دھند کے لیے خصوصی وارننگ جاری کی گئی ہے۔ محکمہ موسمیات نے کہا ہے کہ آئندہ 48 گھنٹوں کے دوران زیادہ سے زیادہ درجہ حرارت میں ایک سے تین ڈگری سیلسیس تک اضافہ ہوسکتا ہے، حالانکہ اس وقت سردی سے کوئی خاص راحت کی توقع نہیں ہے۔جمعہ کے روز سہرسہ کے اگوان پور میں ریاست میں سب سے کم درجہ حرارت 5.1 ڈگری سیلسیس درج کیا گیا۔ راجدھانی پٹنہ میں کم سے کم درجہ حرارت 9.0 ڈگری سیلسیس رہا۔ والمیکی نگر، فاربس گنج اور مونگیر کو چھوڑ کر، پٹنہ سمیت ریاست کے تقریباً تمام اضلاع میں کم از کم درجہ حرارت 10 ڈگری سیلسیس سے کم درج کیا گیا۔دھند کی وجہ سے حد نگاہ بھی بری طرح متاثر ہوئی۔ محکمہ موسمیات کے مطابق ہفتہ کے روز سب سے کم حد نگاہ گیاجی میں صفر میٹر ریکارڈ کی گئی۔ بھاگلپور میں حد نگاہ 20 میٹر اور پٹنہ میں صرف 50 میٹر رہی جس سے سڑک اور ریل ٹریفک بھی متاثر ہوئی۔محکمہ موسمیات کا اندازہ ہے کہ جنوری میں کم سے کم درجہ حرارت عام طور پر 9 سے 12 ڈگری سیلسیس کے درمیان رہے گا۔ سردی اور دھند کے پیش نظر انتظامیہ نے عوام سے اپیل کی ہے کہ وہ احتیاط برتیں، ضرورت پڑنے پر ہی سفر کریں اور سردی سے بچاؤ کے لیے احتیاطی تدابیر اختیار کریں۔ہندوستھان سماچار

ہندوستان سماچار / Mohammad Afzal Hassan