روم، 20 جنوری (ہ س)۔ اطالوی فیشن ڈیزائنر ویلنٹینو گراوانی کا 93 سال کی عمر میں انتقال ہو گیا۔ انہیں بیسویں صدی کی فیشن کی دنیا کا بے تاج بادشاہ کہا جاتا ہے۔ اپنے نام کے فیشن ہاوس کے ساتھ اطالوی گلیمر کو آگے بڑھانے میں ان کا اہم کردار ہے۔ ان کے فاونڈیشن نے پیر کو انسٹاگرام پر کہا، ”ویلنٹینو گراوانی کا آج اپنے روم والے گھر میں اپنے پیاروں کے درمیان انتقال ہو گیا۔“

دی گارجین کی رپورٹ کے مطابق، ویلنٹینو کا جسد خاکی بدھ اور جمعرات کو روم میں فاونڈیشن کے ہیڈ کوارٹر میں رکھا جائے گا۔ ان کی آخری رسومات جمعہ کو اٹلی کے دارالحکومت روم میں ادا کی جائیں گی۔ اٹلی کی وزیر اعظم جیورجیا میلونی نے ایکس پوسٹ میں خراج عقیدت پیش کرتے ہوئے لکھا، ”ویلنٹینو، اسٹائل اور ایلیگنس کے غیر متنازعہ ماسٹر اور اطالوی ہائی فیشن کے دائمی نشان۔ آج اٹلی نے ایک لیجنڈ کو کھو دیا ہے۔ ان کی وراثت نسلوں کو متاثر کرتی رہے گی۔“

صرف ویلنٹینو کے نام سے مشہور اس ڈیزائنر نے 1959 میں اپنا ہاوس شروع کیا۔ جلد ہی صوفیہ لارین اور الزابتھ ٹیلر ان کے مداحوں میں شامل ہو گئیں۔ انہوں نے 1961 میں مائیکل اینجلو اینٹونیونی کی فلم ’لا نوٹ‘ میں اداکارہ مونیکا وٹی کے کپڑے ڈیزائن کیے۔ جیکی کینیڈی نے 1960 کی دہائی میں کئی سالوں تک ان کے کپڑے پہنے۔ انہوں نے 1968 میں ایرسٹوٹل اوناسس سے شادی کی۔

لال ڈریس ویلنٹینو کی ’سگنیچر آئٹم‘ تھی، جو شروع سے ہی ان کے اسٹائل کا حصہ رہی۔ ان کے پہلے کلیکشن میں ’فیسٹا‘ نام کی ایک لال ٹول ڈریس تھی۔ انہوں نے اپنی پوشاکوں میں لال رنگ کا شیڈ استعمال کیا۔ وہ اتنا مشہور ہو گیا ہے کہ اسے کلر اتھارٹی ’پینٹون‘ نے سرکاری طور پر تسلیم کر لیا۔

ویلنٹینو 45 سال تک فیشن کی دنیا میں عروج پر رہے۔ 2007 میں انہوں نے کنارہ کشی اختیار کر لی۔ نومی کیمبل اور کلاڈیا شیفر جیسی ماڈلز اکثر کیٹ واک کے باہر ان کے کپڑے پہنے ہوئے دیکھی جاتی تھیں۔ جولیا رابرٹس، لورا لینی اور پینلوپ کروز جیسی اداکارائیں ریڈ کارپیٹ پر ان کے ڈیزائن کیے کپڑے پہنتی تھیں۔ ویلز کی شہزادی ڈیانا نے طلاق کے بعد کے سالوں میں ان کے ڈیزائن کیے ملبوسات پہنے۔

اس ڈیزائنر کی پیدائش 1932 میں میلان کے پاس شہر ووگیرا میں ہوئی تھی۔ ان کی ماں نے ان کا نام اطالوی اداکار روڈولف ویلنٹینو کے نام پر رکھا تھا۔ بچپن کے تجربات نے ان کے مستقبل کے کیریئر کو شکل دی۔ ویلنٹینو ہمیشہ سوٹ میں پرفیکٹ نظر آتے تھے۔

ہندوستھان سماچار

---------------

ہندوستان سماچار / انظر حسن