میلبورن، 02 جنوری (ہ س)۔ سات بار کی گرینڈ سلیم سنگلز چیمپئن وینس ولیمس کو 18 جنوری سے میلبورن میں شروع ہونے والے آسٹریلین اوپن 2026 ٹینس ٹورنامنٹ کے لیے وائلڈ کارڈ انٹری دی گئی ہے۔ ٹورنامنٹ منتظمین نے جمعہ کو اس کی سرکاری تصدیق کی۔

45 سالہ وینس ولیمس تقریبا 28 سال بعد میلبورن پارک میں واپسی کریں گی۔ انہوں نے یہاں پہلی بار 1998 میں کھیلا تھا، جب انہوں نے دوسرے دور میں اپنی چھوٹی بہن سیرینا ولیمس کو ہرایا تھا۔ حالانکہ، کوارٹر فائنل میں انہیں امریکہ کی ہی لنڈسے ڈیون پورٹ کے ہاتھوں ہار کا سامنا کرنا پڑا تھا۔

وینس نے نومبر میں اعلان کیا تھا کہ وہ آسٹریلین اوپن سے دو ہفتے پہلے آکلینڈ (نیوزی لینڈ) میں کھیلنے اتریں گی، جہاں انہیں بھی وائلڈ کارڈ ملا ہے۔ اس کے علاوہ، آسٹریلین اوپن سے ٹھیک پہلے وہ ہوبارٹ (آسٹریلیا) میں ہونے والے ایک ٹورنامنٹ میں بھی حصہ لیں گی۔

وینس ولیمس آخری بار 2021 میں میلبورن میں کھیلتی نظر آئی تھیں۔ وہ آسٹریلین اوپن ویمنز سنگلز میں دو بار رنر اپ رہ چکی ہیں—2003 اور 2017 میں، جب دونوں ہی بار انہیں فائنل میں بہن سیرینا سے ہار ملی تھی۔

وینس نے کہا، ”میں آسٹریلیا لوٹ کر بے حد پرجوش ہوں اور آسٹریلین سمر کے دوران مقابلہ کرنے کے لیے بے چین ہوں۔ یہاں میری کئی شاندار یادیں جڑی ہیں اور اس جگہ پر لوٹنے کا موقع ملنا میرے کیریئر کے لیے بہت معنی رکھتا ہے۔“

میلبورن پارک میں وینس کا ریکارڈ 54 جیت اور 21 ہار کا رہا ہے۔ 2026 میں یہ 22 ویں بار ہوگا جب وہ آسٹریلین اوپن کے مین ڈرا میں نظر آئیں گی۔

ٹورنامنٹ منتظمین کے مطابق، وینس ولیمس آسٹریلین اوپن کے مین ڈرا میں کھیلنے والی سب سے عمر دراز خاتون کھلاڑی بن جائیں گی۔ اس سے پہلے یہ ریکارڈ جاپان کی کیمیکو ڈیٹ کے نام تھا، جنہوں نے 2015 میں 44 سال کی عمر میں یہاں مقابلہ کھیلا تھا۔

ہندوستھان سماچار

ہندوستان سماچار / انظر حسن